5 ປະເທດສະມາຊິກອາຊຽນໄດ້ເຫັນດີສ້າງຕັ້ງກອງກຳລັງຮັກສາສັນຕິພາບອາຊຽນ

ຕາມໜັງສືພິມຫຼຽນເຮີຈາວປ້າວຂອງສິງກະໂປລາຍງານວ່າ ວັນທີ 25 ກຸມພານີ້ ທ່ານຮິຊຳມູດິນ ຮູເຊັນ ລັດຖະມົນຕີວ່າການກະຊວງປ້ອງກັນປະເທດມາເລເຊຍໄດ້ດຳເນີນການຢ້ຽມຢາມຫວຽດນາມ, ພາຍຫຼັງໄດ້ພົບປະກັບທ່ານຟອງກວາງເທັງ ລັດຖະມົນຕີວ່າການກະຊວງປ້ອງກັນປະເທດຫວຽດນາມແລ້ວໄດ້ອອກແຈ້ງການວ່າ ພາຍໃຕ້ນິຍາມ "ກອງກຳລັງຮັກສາສັນຕິພາບອາຊຽນ", ທະຫານຮັກສາສັນຕິພາບຂອງ ປະເທດສະມາຊິກອາຊຽນຈະປະຕິບັດໜ້າທີ່ຮັກສາສັນຕິພາບຂອງອົງການສະຫະປະຊາຊາດພາຍໃຕ້ຄັນທຸງອາຊຽນ ເຊິ່ງຈະສາມາດເຮັດໃຫ້ປະຊາຄົມໂລກມີຄວາມຢືນຢັນຕື່ມອີກຕໍ່ອາຊຽນທີ່ເປັນອົງການຮ່ວມມືລະດັບພາກພື້ນ.

ທ່ານຮິຊຳມູດິນຢືນຢັນວ່າ ມາຮອດປັດຈຸບັນ, ໄທ, ມຽນມາ, ກຳປູເຈຍ, ລາວແລະຫວຽດນາມລ້ວນແຕ່ໄດ້ເຫັນດີນຳນິຍາມທີ່ວ່າ "ກອງກຳລັງຮັກສາສັນຕິພາບອາຊຽນ" ເຊິ່ງສະເໜີໂດຍມາເລເຊຍ, ເພື່ອເພີ່ມທະວີຄວາມໝັ້ນຄົງຂອງພາກພື້ນແຫ່ງນີ້ແລະເພີ່ມທະວີການພົວພັນຮ່ວມມືໃນຂົງເຂດການທະຫານລະຫວ່າງປະເທດສະມາຊິກອາຊຽນເພື່ອຕໍ່ຕ້ານການຮຸກຮານຂອງພວກກໍ່ການຮ້າຍເຊັ່ນກຸ່ມຫົວຮຸນແຮງ "ລັດອິສລາມ" ຫຼື IS. ທ່ານຮິຊຳມູດິນກ່າວເນັ້ນວ່າ ກອງປະຊຸມລັດຖະມົນຕີປ້ອງກັນປະເທດອາຊຽນມີຄວາມສຳຄັນຫຼາຍ, ໃນລຍະການດຳເນີນກອງປະຊຸມ, ລັດຖະມົນຕີວ່າການກະຊວງປ້ອງກັນປະເທດຂອງ 10 ປະເທດສະມາຊິກອາຊຽນຈະປຶກສາຫາລືກ່ຽວກັບການຕໍ່ຕ້ານສິ່ງທ້າທາຍຕໍ່ຄວາມໝັ້ນຄົງທີ່ນັບມື້ນັບເພີ່ມຫຼາຍຂຶ້ນໃນພາກພື້ນຄືແນວໃດ.