ໜັງສືພິມປະຊາຊົນລາຍວັນຂອງຈີນລາຍງານວ່າ, ທ່ານສີຈິ້ນຜິງ, ປະທານປະເທດຈີນໄດ້ສະເໜີການວາງແຜນຍຸດທະສາດ "4 ຮອບດ້ານ" ຄື "ສ້າງສັງຄົມອິ່ມໜຳສຳລານໃຫ້ສຳເລັດຢ່າງຮອບດ້ານ, ລົງເລິກການປະຕິຮູບຢ່າງຮອບດ້ານ, ປົກຄອງປະເທດຕາມກົດໝາຍຢ່າງຮອບດ້ານ, ຄຸ້ມຄອງພັກຢ່າງເຂັ້ມງວດຮອບດ້ານ". ນັກວິຊານການແລະຊ່ຽວຊານຕ່າງປະເທດໄດ້ຕີລາຄາສູງຕໍ່ການວາງແຜນຍຸດທະສາດດັ່ງກ່າວ ໂດຍກ່າວວ່າ, ການປະຕິບັດການວາງແຜນຍຸດທະສາດ"4 ຮອບດ້ານ"ແມ່ນບາດກ້າວທີ່ສໍາຄັນຂອງພັກກອມມູນິດຈີນທີ່ນໍາພາປະຊາຊົນກ້າວເດີນໄປສູ່ການບັນລຸເປົ້າໝາຍທີ່ຍິ່ງໃຫຍ່.
ທ່ານລີເຢີນລຽງ, ສາສະດາຈານສະຖາບັນບັນດິດພັດທະນະບໍລິຫານສາດແຫ່ງຊາດໄທກ່າວວ່າ, ການວາງແຜນຍຸດທະສາດ "4 ຮອບດ້ານ"ທີ່ສະເໜີໂດຍທ່ານສີຈິ້ນຜິງແມ່ນສອດຄ່ອງກັບເປົ້າໝາຍລວມ ແລະແນວຄວາມຄິດລວມຂອງການປະຕິຮູບແລະການຟື້ນຟູຄວາມຈະເລີນຮຸ່ງເຮືອງແຫ່ງຊາດຄືນໃໝ່ຂອງຈີນ ທັງສອດຄ່ອງກັບຄວາມເປັນຈິງດ້ານການພັດທະນາຂອງຈີນ, ມີສາຍຕາຍຸດທະສາດທີ່ຍາວໄກ.
ນັກວິຈານຂອງວາລະສານວຽກງານອາຟຣິກາແລະອາຊີຕາເວັນອອກຂອງອາຟຣິກາໃຕ້ກ່າວວ່າ, ການຊຸກຍູ້ການສ້າງສັງຄົມອິ່ມໜຳສຳລານໃຫ້ສຳເລັດຢ່າງຮອບດ້ານນັ້ນ ຈະມີຜົນດີຕໍ່ການພັດທະນາເສດຖະກິດຈີນ, ສ້າງໂອກາດປະກອບອາຊີບຈໍານວນຫຼວງຫຼາຍ, ປັບປຸງສິ່ງແວດລ້ອມນິເວດໃຫ້ດີຂຶ້ນຕື່ມອີກ. ທ່ານລີເສີງ, ຫົວໜ້າສູນຈີນຈອນ ແອນ ໂທນຕັນ ຂອງສະຖາບັນບຣູກິງສຂອງອາເມລິກາກ່າວວ່າ, ຈຸດສໍາຄັນຂອງການສ້າງສັງຄົມອິ່ມໜຳສຳລານໃຫ້ສຳເລັດຢ່າງຮອບດ້ານແລະການລົງເລິກການປະຕິຮູບຢ່າງຮອບດ້ານແມ່ນການກໍ່ສ້າງດ້ານເສດຖະກິດ, ສ່ວນການປົກຄອງປະເທດຕາມກົດໝາຍຢ່າງຮອບດ້ານແລະການຄຸ້ມຄອງພັກຢ່າງເຂັ້ມງວດຮອບດ້ານນັ້ນ ແມ່ນເອົາໃຈໃສ່ການກໍ່ສ້າງດ້ານການເມືອງ ແລະເນັ້ນໜັກເຖິງການກໍ່ສ້າງລະບອບຢ່າງຮອບດ້ານແລະຢ່າງເປັນລະບົບ ເຊິ່ງມີຄວາມໝາຍທີ່ສໍາຄັນ.
ຫົວໜ້າກອງເລຂາຂອງໜ່ວຍງານມິດຕະພາບເອີຣົບ-ຈີນຂອງສະພາເອີຣົບໃຫ້ສໍາພາດຕໍ່ນັກຂ່າວວ່າ, ຍຸດທະສາດ"4 ຮອບດ້ານ"ໄດ້ສ່ອງແສງໃຫ້ເຫັນເຖິງຄວາມກ້າຫານແລະສະຕິປັນຍາດ້ານການເມືອງຂອງຜູ້ນໍາລຸ້ນໃໝ່ຂອງຈີນ ເຊິ່ງໄດ້ເຮັດໃຫ້ຈີນສາມາດກໍາເອົາໂອກາດລົງເລິກການປະຕິຮູບຂອງຂົງເຂດທີ່ສໍາຄັນ, ສ້າງລະບົບລະບຽບທີ່ຄົບຖ້ວນ, ມີວິທະຍາສາດ, ຢ່າງເປັນລະບຽບແບບແຜນ ແລະດໍາເນີນຢ່າງມີປະສິດທິພາບ.