ຕາມຂ່າວສານຊິນຮວາ: ວັນທີ 25 ກຸມພານີ້, ທ່ານພົນເອກຟິລິບ ບຣີດລົບ ຂອງອາເມລິກາທີ່ເປັນເຈົ້າໜ້າທີ່ການທະຫານສູງສຸດຂອງກຸ່ມນາໂຕ ໄດ້ກ່າວວ່າ, ປັດຈຸບັນ, ບໍ່ສາມາດຄາດຄະເນໄດ້ວ່າ, ຣັດເຊຍຈະໃຊ້ມາດຕະການຕອບໂຕ້ແນວໃດຕໍ່ອາເມລິກາທີ່ຈະສະໜອງອາວຸດລ້າງຜານໃຫ້ແກ່ອູແກຣນ, ແຕ່ສະຖານະການຂອງອູແກຣນອາດຈະຮ້າຍແຮງຂຶ້ນຕື່ມຍ້ອນເລື່ອງນີ້.
ໃນກອງປະຊຸມຟັງຄຳໃຫ້ການທີ່ຈັດຂຶ້ນໂດຍກຳມາທິການການທະຫານຂອງສະພາຕ່ຳໃນມື້ດຽວກັນ, ທ່ານບຣີດລົບກ່າວວ່າ, ປັດຈຸບັນ, ທຳນຽບຂາວຍັງພວມຂໍຄວາມເຫັນນຳເຈົ້າໜ້າທີ່ທະຫານກ່ຽວກັບຈະສະໜອງອາວຸດລ້າງຜານໃຫ້ກອງທັບລັດຖະບານອູແກຣນຫຼືບໍ່. ຫວ່າງມໍ່ໆມານີ້, ທ່ານແລະທ່ານບາຣັກ ໂອບາມາ, ປະທານາທິບໍດີອາເມລິກາ ໄດ້ປຶກສາຫາລືກັນກ່ຽວກັບສະຖານະການຂອງອູແກຣນ, ໃນນັ້ນ, ທ່ານໄດ້ແຈ້ງອາວຸດລ້າງຜານທີ່ອູແກຣນຮຽກຮ້ອງໃຫ້ອາເມລິກາສະໜອງໃຫ້ນັ້ນໃຫ້ທ່ານໂອບາມາຮັບຊາບ.
ທ່ານບຣີດລົບກ່າວຕື່ມວ່າ, ປັດຈຸບັນ, ຍັງບໍ່ສາມາດທີ່ຈະຄາດຄະເນໄດ້ວ່າ, ຣັດເຊຍຈະໃຊ້ຮູບການແນວໃດເພື່ອຕອບໂຕ້ກັບການກະທຳດັ່ງກ່າວຂອງອາເມລິກາ. ທ່ານກ່າວອີກວ່າ, ເມື່ອອາວຸດຍຸດໂທປະກອນຂອງກອງທັບລັດຖະບານອູແກຣນຍົກລະດັບສູງຂຶ້ນແລ້ວ, ດ້ານໜຶ່ງ, ຈະກາຍເປັນກຳລັງນາບຂູ່, ແຕ່ອີກດ້ານໜຶ່ງ, ອາດຈະກະຕຸ້ນຝ່າຍຣັດເຊຍ, ແລະເຮັດໃຫ້ສະຖານະການຮ້າຍແຮງຂຶ້ນຕື່ມ.