ຕາມຂ່າວສານຊິນຮວາ: ວັນທີ 25 ກຸມພານີ້, ສະພາຄວາມໝັ້ນຄົງອົງການສະຫະປະຊາຊາດໄດ້ອອກຖະແຫຼງການ, ໂດຍໄດ້ກ່າວປະນາມຢ່າງຮຸນແຮງຕໍ່ກຸ່ມ IS ເຊິ່ງເປັນອົງການຫົວຮຸນແຮງທີ່ໄດ້ລັກພາຕົວຜູ້ເຊື່ອຖືສາສະໜາຄຣິສຕຽນ 90 ຄົນເປັນຢ່າງໜ້ອຍຢູ່ພາກຕາເວັນອອກສຽງເໜືອຂອງຊີຣີ.
ໃນຖະແຫຼງການດັ່ງກ່າວ, ສະພາຄວາມໝັ້ນຄົງໄດ້ກ່າວປະນາມຢ່າງຮຸນແຮງຕໍ່ທຸກການກະທຳທີ່ໃຊ້ຄວາມຮຸນແຮງຕໍ່ປະຊາຊົນສາມັນ, ລວມທັງການທາລຸນທີ່ເອົາເຊື້ອຊາດ, ສາສະໜາ ຫຼືຄວາມເຊື່ອຖືເປັນຂໍ້ອ້າງ. ນອກນັ້ນ, ຖະແຫຼງການຍັງໄດ້ກ່າວປະນາມຢ່າງຮຸນແຮງຕໍ່ການກະທຳຂອງກຸ່ມ IS ທີ່ທຳລາຍແລະຢຽບຫຍຳສະຖານທີ່ສາສະໜາຄຣິສຕຽນແລະສາສະໜາອື່ນ.
ສະພາຄວາມໝັ້ນຄົງຮຽກຮ້ອງກຸ່ມ IS, "ແນວໂຮມສະໜັບສະໜູນ" ພ້ອມດ້ວຍບຸກຄົນແລະອົງການອື່ນໆທີ່ມີສ່ວນກ່ຽວຂ້ອງກັບກຸ່ມ "ອັນໄຄດາ" ໃຫ້ປ່ອຍຕົວປະກັນທັງໝົດໂດຍບໍ່ມີເງື່ອນໄຂແຕ່ຢ່າງໃດ, ແລະກ່າວເນັ້ນວ່າຈະສືບຫາຄວາມຮັບຜິດຊອບຂອງຜູ້ໃຊ້ທາລຸນກຳ.
ວັນທີ 23 ກຸມພານີ້, ກຸ່ມ IS ໄດ້ບຸກໂຈມຕີບ້ານໜຶ່ງຂອງຜູ້ເຊື່ອຖືສາສະໜາຄຣິສຕຽນຢູ່ແຂວງຮາຊາຄາ, ທາງພາກຕາເວັນອອກສຽງເໜືອຂອງຊີຣີ, ໂດຍໄດ້ລັກພາຕົວຜູ້ເຊື່ອຖືສາສະໜາຄຣິສຕຽນ 90 ຄົນເປັນຢ່າງໜ້ອຍ. ຫຼັງຈາກນັ້ນ, ກຸ່ມດັ່ງກ່າວໄດ້ອອກຖະແຫຼງການ, ໂດຍສະເໜີໃຫ້ເອົາຕົວປະກັນມາແລກປ່ຽນພວກ ປະກອບອາວຸດຂອງກຸ່ມຫົວຮຸນແຮງທີ່ຖືກກັກຕົວ, ຖ້າບໍ່ດັ່ງນັ້ນ, ຈະປະຫານຊີວິດຕົວປະກັນເຫຼົ່ານີ້.
 |
