ຕາມຂ່າວສານຊິນຮວາ: ວັນທີ 25 ກຸມພານີ້, ທ່ານບາຣັກ ໂອບາມາ, ປະທານາທິບໍດີອາເມລິກາໄດ້ອອກຄຳສັ່ງໃຫ້ສ້າງຕັ້ງອົງການຄວາມປອດໄພທາງອິນເຕີເນັດທີ່ມີຊື່ວ່າ "ສູນລວບລວມຂ່າວລັບທີ່ຂົ່ມຂູ່ຕໍ່ອິນເຕີເນັດ", ເຊິ່ງມີຈຸດປະສົງເພື່ອປະສານງານແລະລວບລວມຂ່າວລັບທາງດ້ານອິນເຕີເນັດທີ່ເກັບກຳໂດຍອົງການທີ່ມີຢູ່ໃນປັດຈຸບັນຂອງອາເມລິກາ, ແລະເພີ່ມຄວາມສາມາດຂອງອາເມລິກາໃນການຮັບມືກັບການຂົ່ມຂູ່ຕໍ່ອິນເຕີເນັດ.
ທຳນຽບຂາວໄດ້ອອກຖະແຫຼງການ, ໂດຍກ່າວວ່າ, ອົງການທີ່ສ້າງຕັ້ງຂຶ້ນໃໝ່ນີ້ຈະນຳພາໂດຍຜູ້ກຳກັບຂ່າວລັບແຫ່ງຊາດ, ແຕ່ມັນບໍ່ແມ່ນ "ສູນການເຄື່ອນໄຫວ", ຈະບໍ່ເກັບກຳຂ່າວລັບ, ບໍ່ຮັບຜິດຊອບການຮັບມືກັບອຸບັດເຫດ, ບໍ່ບັນຊາການສຳຫຼວດອຸບັດເຫດ, ແລະຈະບໍ່ເຂົ້າແທນພາກສ່ວນ, ອົງການ ແລະສູນອິນເຕີເນັດທີ່ມີຢູ່ໃນປັດຈຸບັນຂອງລັດຖະບານ.
ນັບແຕ່ຕົ້ນປີນີ້ມາ, ທ່ານໂອບາມາໄດ້ມີການກະທຳເລື້ອຍໆໃນດ້ານຄວາມປອດໄພຂອງອິນເຕີເນັດ, ເຊິ່ງບໍ່ພຽງແຕ່ໄດ້ສະເໜີຂໍ້ສະເໜີໃຫ້ສ້າງກົດໝາຍກ່ຽວກັບຄວາມປອດໄພຂອງອິນເຕີເນັດເທົ່ານັ້ນ, ແຕ່ຍັງໄດ້ເຊັນລັດຖະດຳລັດເພື່ອຮຽກຮ້ອງໃຫ້ວິສາຫະກິດແບ່ງປັນຂ່າວຄາວໃນດ້ານຄວາມປອດໄພຂອງອິນເຕີເນັດໃຫ້ລັດຖະບານ. ພ້ອມດຽວກັນນັ້ນ, ກໍມີອົງການແລະວິສາຫະກິດຂອງອາເມລິກາກ່າວໃນບາງຄັ້ງບາງຄາວວ່າ, ຂໍ້ມູນຂອງລູກຄ້າຖືກແຮກເກີລັກເອົາ.