ວັນທີ 26 ກຸມພານີ້, ເຈົ້າໜ້າທີ່ທະຫານອູແກຣນປະກາດວ່າ, ກອງທັບລັດຖະບານອູແກຣນໄດ້ເລີ່ມຖອນອາວຸດໜັກອອກຈາກເຂດທີ່ເກີດການປະທະກັນ.
ຕອນບ່າຍວັນທີ 26 ກຸມພານີ້, ທ່ານອານາໂຕລີ ສະເຕນມາກ, ໂຄສົກກອງທັບລັດຖະບານອູແກຣນກ່າວໃນກອງປະຊຸມຖະແຫຼງຂ່າວວ່າ, ກອງທັບທີ່ເຂົ້າຮ່ວມ"ການເຄື່ອນໄຫວຕໍ່ຕ້ານການກໍ່ການຮ້າຍ"ຂອງອູແກຣນ ໄດ້ເລີ່ມຖອນປືນໃຫຍ່ອອກຈາກເຂດທີ່ເກີດການປະທະກັນຢ່າງໜ້ອຍ 25 ກິໂລແມັດ.
ວັນທີ 26 ກຸມພານີ້, ກ່ອນຈັດກອງປະຊຸມຖະແຫຼງຂ່າວດັ່ງກ່າວ, ກົມໃຫຍ່ເສນາທິການຂອງກໍາລັງປະກອບອາວຸດອູແກຣນໄດ້ອອກຖະແຫຼງການຢູ່ທາງເວັບໄຊຂອງກະຊວງປ້ອງກັນປະເທດອູແກຣນວ່າ, ເພື່ອປະຕິບັດຕາມສັນຍາມິນສ໌ກ໌ທີ່ໄດ້ບັນລຸໃນວັນທີ 12 ກຸມພານີ້, ກອງທັບລັດຖະບານອູແກຣນຈະຖອນປືນໃຫຍ່ທີ່ມີຄວາມກວ້າງຂອງຂະໜາດປາກປືນຫຼາຍກວ່າ 100 ມີລີແມັດອອກຈາກເຂດທີ່ເກີດການປະທະກັນເລີ່ມແຕ່ວັນທີ 26 ກຸມພານີ້ເປັນຕົ້ນໄປ. ນີ້ແມ່ນບາດກ້າວທໍາອິດຂອງການຖອນອາວຸດໜັກ. ກອງທັບລັດຖະບານອູແກຣນໄດ້ຮຽກຮ້ອງໃຫ້ຝ່າຍຕ່າງໆທີ່ກ່ຽວຂ້ອງຈົ່ງຢຸດຍິງຢ່າງຮອບດ້ານ ແລະປະຕິບັດຕາມສັນຍາດັ່ງກ່າວ. ຖ້າຫາກມີຝ່າຍໃດໆກໍ່ການໂຈມຕີ, ແຜນການຖອນອາວຸດໜັກຈະຖືກປ່ຽນແປງ.
