ຕາມສື່ມວນຊົນຕ່າງປະເທດລາຍງານວ່າ, ເມື່ອບໍ່ດົນມານີ້, ລັດຖະມົນຕີວ່າການກະຊວງພະລັງງານຟິລິບປິນກ່າວວ່າ, ຍ້ອນສາເຫດດ້ານຄວາມໝັ້ນຄົງຂອງປະເທດ, ຟິລິບປິນຈະຢຸດຕິການໃຫ້ວິສາຫະກິດຈີນເຂົ້າຮ່ວມການດໍາເນີນທຸລະກິດຂອງບໍລິສັດເຄືອຂ່າຍໄຟຟ້າແຫ່ງຊາດຟິລິບປິນ, ປັດຈຸບັນ, ວິສະວະກອນຈີນທີ່ກໍາລັງເຮັດວຽກຢູ່ບໍລິສັດເຄືອຂ່າຍໄຟຟ້າແຫ່ງຊາດຟິລິບປິນຈະເດີນທາງກັບຄືນຈີນ, ແຕ່ບໍລິສັດເຄືອຂ່າຍໄຟຟ້າແຫ່ງຊາດຈີນຍັງຖືເອົາ 40% ຂອງຫຸ້ນສ່ວນບໍລິສັດເຄືອຂ່າຍໄຟຟ້າແຫ່ງຊາດຟິລິບປິນ.
ວັນທີ 26 ກຸມພານີ້, ຢູ່ນະຄອນຫຼວງປັກກິ່ງຂອງຈີນ, ທ່ານຫົງເຫຼີຍ, ໂຄສົກກະຊວງການຕ່າງປະເທດຈີນກ່າວຕອບໂຕ້ວ່າ, ໃນປີ 2007, ວິສາຫະກິດຂອງຈີນໄດ້ຮັບສໍາປະທານດໍາເນີນທຸລະກິດເປັນເວລາ 25 ປີຂອງບໍລິສັດເຄືອຂ່າຍໄຟຟ້າແຫ່ງຊາດຟິລິບປິນດ້ວຍການເຂົ້າຮ່ວມການປະມູນ ເຊິ່ງໄດ້ປະກອບສ່ວນອັນສໍາຄັນເຂົ້າໃນການກໍ່ສ້າງພະລັງງານໄຟຟ້າຂອງຟິລິບປິນ. ຫວັງວ່າຝ່າຍຟິລິບປິນຈະແກ້ໄຂບັນຫາທີ່ກ່ຽວຂ້ອງໃຫ້ດີຢ່າງທ່ຽງທໍາ ແລະຍຸຕິທໍາ, ປົກປ້ອງສິດແລະຜົນປະໂຫຍດທີ່ຊອບດ້ວຍກົດໝາຍຂອງວິສາຫະກິດຈີນທີ່ຢູ່ຟິລິບປິນຢ່າງແທ້ຈິງ ເພື່ອສ້າງສະພາບແວດລ້ອມທີ່ດີໃຫ້ແກ່ບັນດາວິສາຫະກິດຕ່າງປະເທດໃນການໄປລົງທຶນຢູ່ຟິລິບປິນ.
