ສ້າງພື້ນຖານຄວາມໝັ້ນຄົງທາງການເມືອງແລະຄວາມໄວ້ເນື້ອເຊື່ອໃຈກັນໃຫ້ດີ, ເຮັດໃຫ້ການພົວພັນລະຫວ່າງຈີນກັບອາຊຽນເດີນໄປໜ້າຢ່າງໝັ້ນທ່ຽງແລະຍາວໄກກວ່າເກົ່າ
2015-03-29 17:37:16 cri
ວັນທີ 28 ມີນານີ້, ທ່ານວັງອີ້, ລັດຖະມົນຕີວ່າການກະຊວງການຕ່າງປະເທດຈີນໄດ້ກ່າວຄຳປາໄສໃນເວທີປຶກສາຫາລືທີ່ມີຫົວຂໍ້ວ່າ "ປະຊາຄົມອາຊຽນ: ຈຸດເລີ່ມຕົ້ນໃໝ່ແຫ່ງການຫັນເປັນອັນໜຶ່ງອັນດຽວກັນ" ໃນເວທີປຶກສາຫາລືອາຊີໂປອາວ ໂດຍກ່າວເນັ້ນວ່າ, ຕ້ອງສ້າງພື້ນຖານຂອງຄວາມໄວ້ເນື້ອເຊື່ອໃຈທາງການເມືອງແລະຄວາມໝັ້ນຄົງໃຫ້ດີ, ເຮັດໃຫ້ການພົວພັນລະຫວ່າງຈີນກັບອາຊຽນເດີນໄປໜ້າຢ່າງໝັ້ນທ່ຽງແລະຍາວໄກກວ່າເກົ່າ. ທ່ານຊີ້ອອກວ່າ, ຈີນຍິນດີຕັ້ງໜ້າຊຸກຍູ້ຂະບວນການເຊັນ "ສັນຍາການຮ່ວມມືແລະມີໄມຕີຈິດມິດຕະພາບຖານບ້ານໃກ້ເຮືອນຄຽງທີ່ດີຕໍ່ກັນລະຫວ່າງຈີນກັບປະເທດອາຊຽນ", ສະໜອງການຮັບປະກັນຈາກດ້ານກົດໝາຍແລະລະບຽບການທີ່ແຂງແຮງໃຫ້ແກ່ການຂະຫຍາຍການພົວພັນລະຫວ່າງສອງຝ່າຍ. ຈັດກອງປະຊຸມບໍ່ເປັນທາງການລະດັບລັດຖະມົນຕີກະຊວງປ້ອງກັນປະເທດລະຫວ່າງຈີນກັບອາຊຽນທີ່ຈັດຂຶ້ນຢູ່ຈີນເປັນເທື່ອທຳອິດໃຫ້ດີ, ຕັ້ງໜ້າສົ່ງເສີມທັດສະນະຄວາມໝັ້ນຄົງທີ່ຮ່ວມກັນ, ແບບສັງລວມ, ຮ່ວມມືກັນແລະຍືນຍົງ, ເພີ່ມທະວີການຮ່ວມມືທາງຄວາມປອດໄພໃນຂົງເຂດດັ້ງເດີມແລຂົງເຂດໃໝ່, ອຳນວຍຜະລິດຕະພັນດ້ານຄວາມໝັ້ນຄົງຫຼາຍກວ່າເກົ່າໃຫ້ແກ່ພາກພື້ນແຫ່ງນີ້. ພວກຂ້າພະເຈົ້າຍິນດີອີງຕາມ "ແນວຄິດສອງແລວທາງ" ທີ່ຈີນແລະປະເທດສ່ວນຫຼາຍໃນອາຊຽນລ້ວນແຕ່ຮັບເຫັນດີນຳກັນນັ້ນ, ຍຶດໝັ້ນແກ້ໄຂຄວາມຂັດແຍ່ງກັນຈຳນວນໜຶ່ງທີ່ຕົກຄ້າງມາແຕ່ປະຫວັດສາດໃຫ້ເໝາະສົມດ້ວຍສັນຕິວິທີ, ຮ່ວມກັນປົກປັກຮັກສາສັນຕິພາບແລະສະເຖຍລະພາບຂອງພາກພື້ນທະເລຈີນໃຕ້ໃຫ້ດີ.