ເຈົ້າໜ້າທີ່ຈີນກ່າວວ່າ ການບັນລຸສັນຍາຮອບດ້ານວ່າດ້ວຍບັນຫານີວເຄລຍອີຣານຕ້ອງການໃຫ້ຝ່າຍຕ່າງໆກຳແໜ້ນໂອກາດແລະສະແດງໃຫ້ເຫັນຄວາມພິກໄຫວ

ຕາມຂ່າວ CRI ລາຍງານວ່າ: ແຕ່ວັນທີ 28 ຫາວັນທີ 29 ມີນານີ້, ຜູ້ແທນຂອງເຢຍລະມັນ, ຝະຣັ່ງ, ຈີນ, ຣັດເຊຍ, ອັງກິດແລະສະຫະ ພາບເອີຣົບໄດ້ເດີນທາງໄປເຖິງນະຄອນໂລຊັນແຫ່ງປະເທດສະວິສຕາມລຳດັບເພື່ອເຂົ້າຮ່ວມການເຈລະຈາສັນຍາຮອບດ້ານວ່າດ້ວຍບັນຫານີວເຄລຍຂອງອີຣານ. ວັນທີ 30 ມີນານີ້, ທ່ານນາງຮວ້າຊຸນຢິງ ໂຄສົກກະຊວງການຕ່າງປະເທດຈີນໄດ້ໃຫ້ທັດສະນະຢູ່ທີ່ນະຄອນ ຫຼວງປັກກິ່ງວ່າ, ສະຖານະການເຈລະຈາໃນປັດຈຸບັນໄດ້ເກີດມີການປ່ຽນແປງທີ່ດີ, ຫວັງວ່າຝ່າຍຕ່າງໆຈົ່ງກຳແໜ້ນໂອກາດ, ສະແດງໃຫ້ເຫັນຄວາມພິກໄຫວ ເພື່ອບັນລຸສັນຍາຮອບດ້ານໂດຍໄວ.

ທ່ານນາງຮວ້າຊຸນຢິງກ່າວວ່າ, ທ່ານຫວາງຢີ້ ລັດຖະມົນຕີວ່າການກະຊວງການຕ່າງປະເທດຈີນໄດ້ເດີນທາງໄປນະຄອນໂລຊັນແຫ່ງປະເທດສະວິສເພື່ອເຂົ້າຮ່ວມກອງປະຊຸມລັດຖະມົນຕີການຕ່າງປະເທດ 6 ປະເທດກ່ຽວກັບບັນຫານີວເຄລຍອີຣານ ເຊິ່ງໄດ້ລົງເລິກປຶກສາຫາລືກັບ ລັດຖະມົນຕີການຕ່າງປະເທດຂອງບັນດາປະເທດກ່ຽວກັບບັນຫາສຳຄັນທີ່ການເຈລະຈາກຳລັງປະເຊີນໜ້າໃນປັດຈຸບັນ. ຝ່າຍຈີນຈະສືບຕໍ່ຮ່ວມມືກັບຝ່າຍຕ່າງໆທີ່ກ່ຽວຂ້ອງອອກແຮງຊຸກຍູ້ການເຈລະຈາບັນຫານີວເຄລຍອີຣານໃຫ້ແຕກດອກອອກຜົນໂດຍໄວເທົ່າທີ່ຈະໄວໄດ້.