ເພື່ອລະນຶກຜູ້ປະສົບເຄາະຮ້າຍໃນເຫດການຫຼອນໂຈມຕີກໍ່ການຮ້າຍບາໂດ ແລະເປັນການອອກສຽງສະໜັບສະໜູນຕຸຍນີຊີໃນການຕໍ່ຕ້ານລັດທິກໍ່ການຮ້າຍ, ນັກການເມືອງຫຼາຍປະເທດ ເຊັ່ນ ທ່ານຟຣັງຊົວ ອໍລອງ, ປະທານາທິບໍດີຝຣັ່ງ, ທ່ານມາຮ໌ມຸດ ອັບບັສປະທານາທິບໍດີປາເລັສຕິນ ແລະອື່ນໆ ໄດ້ເຂົ້າຮ່ວມການແຫ່ຂະບວນຕ້ານລັດທິກໍ່ການຮ້າຍທີ່ຈັດຂຶ້ນຢູ່ນະຄອນຫຼວງຂອງຕຸຍນີຊີໃນວັນທີ 29 ມີນານີ້.
ຕອນເຊົ້າມື້ນັ້ນ, ພາຍໃຕ້ການນຳພາຂອງທ່ານເບຈີ ເຊອິດ ເອຊິບຣີ, ປະທານາທິບໍດີຕຸຍນີຊີ, ປະຊາຊົນຕຸຍນີຊີຫຼາຍພັນຄົນພ້ອມດ້ວຍນັກການເມືອງຜູ້ສຳຄັນຂອງຫຼາຍປະເທດທີ່ໄປອອກສຽງສະໜັບສະໜູນຕຸຍນີຊີ ໄດ້ເດີນຂະບວນຈາກເຂດຖະໜົນບັບ ຊາອາດຸນ ມຸ່ງໜ້າໄປສູ່ຫໍພິພິທະພັນບາໂດທີ່ຢູ່ກາງເມືອງ.
ພາຍຫຼັງຖັນແຖວແຫ່ຂະບວນເດີນທາງໄປຮອດຫໍພິພິທະພັນບາໂດແລ້ວ, ທ່ານເບຈີ ເຊອິດ ເອຊິບຣີ, ປະທານາທິບໍດີຕຸຍນີຊີ ກໍໄດ້ເປັນປະທານຈັດພິທີເພື່ອລະນຶກຜູ້ປະສົບເຄາະຮ້າຍໃນເຫດການຫຼອນໂຈມຕີກໍ່ການຮ້າຍ, ແລະເປີດອະນຸສາວະລີທີ່ສະຫຼັກຊື່ຂອງຜູ້ປະສົບເຄາະຮ້າຍ. ທ່ານເອຊິບຣີ ກ່າວວ່າ: ການແຫ່ຂະບວນຂະໜາດໃຫຍ່ຄັ້ງນີ້ໄດ້ສະແດງໃຫ້ເຫັນວ່າ ປະຊາຊົນຕຸຍນີຊີຈະບໍ່ອ່ອນຍອມຕໍ່ລັດທິກໍ່ການຮ້າຍຢ່າງເດັດຂາດ.