ວັນທີ 30 ມີນານີ້, ເວັບໄຊ TripAdvisor ທີ່ເປັນເວັບໄຊການທ່ອງທ່ຽວໃຫຍ່ທີ່ສຸດຂອງໂລກ ໄດ້ເປີດເຜີຍບົດລາຍງານເສດຖະກິດການທ່ອງທ່ຽວໂລກປີ 2015 ໂດຍຂຽນວ່າ, ຈໍານວນຖ້ຽວຂອງນັກທ່ອງທ່ຽວຈີນໄປທ່ຽວຕ່າງປະເທດຈະເພີ່ມຂຶ້ນ 14%.
ບົດລາຍງານຂຽນວ່າ, ນັກທ່ອງທ່ຽວຈີນ 45% ກ່າວວ່າ ເຂົາເຈົ້າກໍາລັງສະສົມເງິນ ເພື່ອຄວາມໃຝ່ຝັນດ້ານການທ່ອງທ່ຽວຂອງຕົນ. ຖ້າບໍ່ພິຈາລະນາເຖິງຄ່າໃຊ້ຈ່າຍ, ໃນ 24 ເດືອນຕໍ່ໜ້ານີ້, ອາເມລິກາ, ຍີ່ປຸ່ນ ແລະອົສຕຣາລີ ຍັງເປັນປະເທດທີ່ນັກທ່ອງທ່ຽວຈີນຢາກໄປທ່ຽວທີ່ສຸດ. ນັກທ່ອງທ່ຽວຈີນ 41% ເຫັນວ່າ ເຂົາເຈົ້າກໍາລັງລໍຖ້າມື້ພັກເພື່ອໄປທ່ອງທ່ຽວ. ນອກນີ້, ຍັງມີອີກ 16% ເຫັນວ່າ, ອັດຕາແລກປ່ຽນເງິນຕາໄດ້ກາຍເປັນປັດໄຈທີ່ສໍາຄັນໃນການເລືອກສະຖານທີ່ທ່ອງທ່ຽວ.