ວັນທີ 30 ເມສາແລ້ວນີ້, ລັດຖະບານລາວໄດ້ຈັດພິທີມອບຫຼຽນກາການພັດທະນາຊັ້ນໜຶ່ງໃຫ້ແກ່ລັດຖະບານຈີນຢູ່ນະຄອນຫຼວງວຽງຈັນຂອງລາວ, ເພື່ອສະແດງຄວາມຂອບອົກຂອບໃຈຕໍ່ຝ່າຍຈີນທີ່ໄດ້ທຳການປະກອບສ່ວນເຂົ້າໃນການສ້າງພື້ນຖານໂຄງລ່າງຂອງລາວ.
ທ່ານບຸນຈັນ ຊິນຕາວົງ, ລັດຖະມົນຕີວ່າການກະຊວງໂຍທາທິການແລະຂົນສົ່ງຂອງລາວໄດ້ຕາງໜ້າລັດຖະບານລາວມອບຫຼຽນກາດັ່ງກ່າວໃຫ້ແກ່ທ່ານກ່ວນຮວາປິ່ງ, ເອກອັກຄະລັດຖະທູດຈີນປະຈຳລາວ. ທ່ານບຸນຈັນໄດ້ສະແດງຄວາມຂອບໃຈຕໍ່ການຊ່ວຍເຫຼືອຂອງຈີນໃນໄລຍະຍາວນານທີ່ຜ່ານມາໃນການພັດທະນາເສດຖະກິດ-ສັງຄົມຂອງລາວ, ແລະໄດ້ຕີລາຄາຢ່າງສູງຕໍ່ໂຄງການຂອງຝ່າຍລາວໃນການສ້າງຂົວຂ້າມແມ່ນ້ຳຂອງຫ້ວຍຊາຍ-ຊຽງຂອງທີ່ຝ່າຍຈີນເປັນຜູ້ຊ່ວຍສ້າງ.
ທ່ານກ່ວນຮວາປິ່ງກ່າວວ່າ: ຫຼຽນກາດັ່ງກ່າວໄດ້ສະແດງໃຫ້ເຫັນຝ່າຍລາວໃຫ້ຄວາມສຳຄັນໃນລະດັບສູງຕໍ່ການພົວພັນລະຫວ່າງຈີນ-ລາວຢ່າງເຕັມປ່ຽມ, ກໍ່ໄດ້ສະແດງໃຫ້ເຫັນມິດຕະພາບອັນເປັນມູນເຊື້ອທີ່ມີໄມຕີຈິດມິດຕະພາບມາແຕ່ດົນນານລະຫວ່າງສອງປະເທດຈີນ-ລາວ. ປະຈຸບັນ, ການເລັ່ງລັດກໍ່ສ້າງການເຊື່ອມໂຍງເຊື່ອມຈອດກັນຢູ່ໃນພາກພື້ນແມ່ນຄວາມມຸ່ງມາດປາຖະນາຮ່ວມຂອງປະຊາຊົນຂອງບັນດາປະເທດໃນພາກພື້ນແຫ່ງນີ້. ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ທີ່ຈີນສະເໜີອອກໄດ້ຮັບຄວາມຍິນດີຕ້ອນຮັບແລະການສະໜັບສະໜູນຈາກບັນດາປະເທດຢູ່ຕາມລຽບແລວທາງເສດຖະກິດຂອງເສັ້ນທາງສາຍໄໝແລະເສັ້ນທາງສາຍໄໝທາງທະເລສະຕະວັດທີ 21 ຊຶ່ງລວມທັງລັດຖະບານລາວ. ຈີນແລະລາວຮ່ວມມືກັນໃນການຊຸກຍູ້ການສ້າງ "ໜຶ່ງແລວທາງໜຶ່ງເສັ້ນທາງ", ຈະສາມາດອຳນວຍໂອກາດໃໝ່ໃຫ້ແກ່ສອງປະເທດໃນການລົງເລິກການຮ່ວມມືໃນຂົງເຂດຕ່າງໆຕື່ມອີກໃນຍຸກໃໝ່.
ໂຄງການຂອງຝ່າຍລາວໃນການສ້າງຂົວຂ້າມແມ່ນ້ຳຂອງຫ້ວຍຊາຍ-ຊຽງຂອງໄດ້ສ້າງສຳເລັດແລະມອບໃຫ້ແກ່ຝ່າຍລາວໃນເດືອນທັນວາປີ 2013, ໄດ້ອຳນວຍຄວາມສະດວກໃຫ້ແກ່ການໄປມາຫາສູ່ກັນລະຫວ່າງປະຊາຊົນຂອງສາມປະເທດຈີນ, ລາວ ແລະ ໄທທີ່ນັບມື້ນັບເນື່ອງນິດ, ໄດ້ຊຸກຍູ້ການເຊື່ອມໂຍງເຊື່ອມຈອດກັນຂອງພາກພື້ນ, ເພີ່ມທະວີຄວາມໝັ້ນໃຈຂອງປະຊາຊົນຂອງບັນດາປະເທດທີ່ຢູ່ລຽບ "ໜຶ່ງແລວທາງໜຶ່ງເສັ້ນທາງ"ໃນການເລັ່ງລັດການພັດທະນາຮ່ວມກັນ.