ວັນທີ 5 ພຶດສະພານີ້, ຢູ່ຫໍສະພາປະຊາຊົນແຫ່ງຊາດທີ່ນະຄອນຫຼວງປັກກິ່ງ, ທ່ານຈ່າງເຕີຈ່ຽງ, ປະທານຄະນະປະຈຳສະພາປະຊາຊົນແຫ່ງຊາດຈີນໄດ້ຕ້ອນຮັບການເຂົ້າຢ້ຽມຄຳນັບຂອງຄະນະຜູ້ແທນສະຫະພັນສະມາຊິກລັດຖະສະພາມິດຕະພາບຍີ່ປຸ່ນ-ຈີນຂອງຍີ່ປຸ່ນທີ່ນຳພາໂດຍທ່ານມະຊະຮີໂຄ ໂຄອູມູຣະ ປະທານສະຫະພັນດັ່ງກ່າວ. ທ່ານຈ່າງເຕີຈ່ຽງກ່າວວ່າ: ຫວ່າງກ່ອນນີ້ບໍ່ດົນ, ທ່ານສີຈິ້ນຜິງ, ປະທານປະເທດຈີນໄດ້ພົບປະກັບທ່ານຊິນໂຈ ອາເບະ, ນາຍົກລັດຖະມົນຕີຍີ່ປຸ່ນຢູ່ອິນໂດເນເຊຍຕາມຄວາມຮຽກຮ້ອງຂອງຍີ່ປຸ່ນ, ແລະໄດ້ສະເໜີຫຼັກການໃຫຍ່ໃນການແກ້ໄຂບັນຫາໃນການພົວພັນລະຫວ່າງຈີນ-ຍີ່ປຸ່ນຢ່າງຈະແຈ້ງ, ນີ້ມີຄວາມໝາຍຊີ້ນຳທີ່ສຳຄັນຕໍ່ການປັບປຸງແລະຂະຫຍາຍການພົວພັນລະຫວ່າງສອງປະເທດ. ບົນພື້ນຖານທີ່ມີຈິດໃຈຖືປະຫວັດສາດເປັນແວ່ນແຍງ ແລະ ອວ່າຍໜ້າໄປສູ່ອະນາຄົດ, ຈີນແລະຍີ່ປຸ່ນຄວນຍຶດຖືທິດທາງທີ່ຖືກຕ້ອງຄືສັນຕິພາບ, ມິດຕະພາບແລະການຮ່ວມມືຢ່າງສະເໝີຕົ້ນສະເໝີປາຍ, ເຄົາລົບຈິດໃຈຫຼັກການເອກະສານການເມືອງ 4 ສະບັບລະຫວ່າງຈີນ-ຍີ່ປຸ່ນຢ່າງແທ້ຈິງ, ຊຸກຍູ້ການພົວພັນລະຫວ່າງສອງປະເທດໃຫ້ໄດ້ຮັບການປັບປຸງໃຫ້ດີຂຶ້ນຢ່າງຕໍ່ເນື່ອງ. ຝ່າຍຈີນຫວັງວ່າຝ່າຍຍີ່ປຸ່ນຈະມີກິລິຍາວາຈາຢ່າງສຸຂຸມຮອບຄອບດ້ວຍທ່າທີທີ່ມີຄວາມຮັບຜິດຊອບ, ແກ້ໄຂບັນຫາທີ່ອ່ອນໄຫວທາງປະຫວັດສາດໃຫ້ດີ. ການເພີ່ມທະວີການແລກປ່ຽນລະຫວ່າງອົງກອນນິຕິບັນຍັດຂອງສອງປະເທດແລະລະຫວ່າງສະມາຊິກສະພາປະຊາຊົນແຫ່ງຊາດຈີນກັບສະມາຊິກລັດຖະສະພາຂອງຍີ່ປຸ່ນ, ມີຜົນດີຕໍ່ການເພີ່ມຄວາມເຂົ້າໃຈ ແລະ ເປີດກວ້າງຄວາມຮັບຮູ້ທີ່ເປັນເອກະສັນກັນ, ຫວັງວ່າສະຫະພັນສະມາຊິກລັດຖະສະພາ ມິດຕະພາບຍີ່ປຸ່ນ-ຈີນຂອງຍີ່ປຸ່ນຈະສາມາດເສີມຂະຫຍາຍບົດບາດທີ່ໃຫຍ່ຫຼວງກວ່າເກົ່າໃນການຊຸກຍູ້ການປັບປຸງແລະຂະຫຍາຍການພົວພັນລະຫວ່າງສອງປະເທດ.
ທ່ານມະຊະຮີໂຄ ໂຄອູມູຣະກ່າວວ່າ: ສະຫະພັນລັດຖະສະພາຍີ່ປຸ່ນ-ຈີນຂອງຍີ່ປຸ່ນຍິນດີທຳຄວາມພະຍາຍາມເພື່ອຊຸກຍູ້ການປັບປຸງການພົວພັນລະຫວ່າງຍີ່ປຸ່ນ-ຈີນໃຫ້ດີຂຶ້ນ.