ຕອນຄໍ່າວັນທີ 4 ພຶດສະພານີ້, ເນື່ອງໃນໂອກາດເຂົ້າຮ່ວມການສົນທະນາຜູ້ນໍາດ້ານອຸດສາຫະກໍາການຄ້າຈີນ-ອາເມລິກາຄັ້ງປະຖົມມະເລີກທີ່ຈັດຂຶ້ນຢູ່ນະຄອນຫຼວງປັກກິ່ງຂອງຈີນ, ທ່ານຈອນ ຟຣິສບີ, ປະທານຄະນະກໍາມະການແຫ່ງຊາດການຄ້າອາເມລິກາ-ຈີນກ່າວວ່າ, ການພົວພັນຈີນ-ອາເມລິກາກໍາລັງສ້າງຜົນປະໂຫຍດດ້ານເສດຖະກິດທີ່ຫຼາຍກວ່າເກົ່າໃຫ້ແກ່ອາເມລິກາ.
ທ່ານຈອນ ຟຣິສບີ ໄດ້ກ່າວໂດຍອີງໃສ່ການຄາດຄະເນຂອງຄະນະກໍາມະການການຄ້າອາເມລິກາ-ຈີນວ່າ, ຈີນໄດ້ສ້າງມູນຄ່າຕະຫຼາດຈໍານວນ 350 ຕື້ໂດລາສະຫະລັດໃຫ້ແກ່ວິສາຫະກິດອາເມລິກາ. ລັດຖະບານຈີນໄດ້ສະເໜີມາດຕະການການປະຕິຮູບດ້ານເສດຖະກິດ ເຊັ່ນການເປີດກວ້າງໃຫ້ທຶນຕ່າງປະເທດເຂົ້າຕະຫຼາດຈີນ, ການພັດທະນາຂະແໜງການຂັ້ນສູງ, ເປີດກວ້າງຄວາມຕ້ອງການພາຍໃນປະເທດ ແລະອື່ນໆ ເຊິ່ງເປັນການສົ່ງສັນຍານອັນຕັ້ງໜ້າໃຫ້ແກ່ວິສາຫະກິດອາເມລິກາ. ທ່ານຍັງກ່າວວ່າ, ການລົງທຶນຂອງວິສາຫະກິດຈີນຕໍ່ອາເມລິກາໄດ້ເພີ່ມຂຶ້ນຢ່າງບໍ່ຢຸດຢັ້ງ ເຊິ່ງໄດ້ສ້າງໂອກາດການເຕີບໂຕຂອງເສດຖະກິດ ແລະການປະກອບອາຊີບໃຫ້ແກ່ອາເມລິກາ.
ທ່ານ ຈອນ ຟຣິສບີ ກ່າວວ່າ, ການຈັດການສົນທະນາລະຫວ່າງນັກທຸລະກິດ ເປັນຊ່ອງທາງທີ່ສໍາຄັນໃນການຊຸກຍູ້ການຮ່ວມມືໃນວົງການອຸດສາຫະກໍາ ແລະການຄ້າ, ການຄ້າ ແລະການລົງທຶນມີຜົນດີຕໍ່ການຂະຫຍາຍຕົວຂອງເສດຖະກິດຈີນແລະອາເມລິກາ ແລະເປັນພື້ນຖານທີ່ສໍາຄັນຂອງການພົວພັນສອງປະເທດ.