ຄຽງຄູ່ກັບການພົວພັນລະຫວ່າງອາເມລິກາ-ກູບາໄດ້ມີທ່າອ່ຽງແຫ່ງການພັດທະນາທີ່ດີ, ວັນທີ 5 ພຶດສະພານີ້, ລັດຖະບານອາເມລິກາໄດ້ອະນຸມັດໃຫ້ບໍລິສັດຢ່າງໜ້ອຍສອງແຫ່ງຂອງລັດຟລໍຣີດາເລີ່ມເປີດເສັ້ນທາງເຮືອໂດຍສານຕໍ່ກູບາ.
ຕາມເວັບໄຊຂອງ "ໜັງສືພິມ The Sun Sentinel daily" ຂອງລັດຟໍລຣີດາລາຍງານວ່າ: ບໍລິສັດສອງແຫ່ງດັ່ງກ່າວໄດ້ຮັບການອະນຸມັດໃຫ້ບັນທຸກນັກທ່ອງທ່ຽວຊາວອາເມລິກາທີ່ໄດ້ຮັບການອະນຸມັດໃຫ້ໄປກູບາ, ໃນນັ້ນລວມທັງຜູ້ຄົນ 12 ຈຳພວກທີ່ບໍ່ຕ້ອງຮ້ອງຂໍໃບອະນຸຍາດລ່ວງໜ້າ.
ມື້ດຽວກັນ, ເວັບໄຊຂອງກະຊວງການເງິນອາເມລິກາໄດ້ເປີດເຜີຍມາດຕະການຊີ້ນຳການດຳເນີນການບໍລິການຂອງເຮືອໂດຍສານລະຫວ່າງອາເມລິກາ-ກູບາ, ໂດຍໄດ້ວາງຂໍ້ກຳນົດກ່ຽວກັບການບັນທຸກຜູ້ຄົນແລະປະເພດສິນຄ້າແລະອື່ນໆ.
ອາເມລິກາໄດ້ປະກາດປະຕິບັດການປິດລ້ອມດ້ານເສດຖະກິດແລະການເງິນທັງຫ້າມຂົນສົ່ງສິນຄ້າເຂົ້າອອກກູບາໃນປີ 1962, ການບໍລິການເຮືອໂດຍສານລະຫວ່າງສອງປະເທດຈຶ່ງໄດ້ຢຸດຕິດຳເນີນງານຍ້ອນສາເຫດດັ່ງກ່າວ. ເດືອນທັນວາຂອງປີ 2014 , ທ່ານບາຣັກ ໂອບາມາ, ປະທານາທິບໍດີອາເມລິກາ ແລະ ທ່ານຣາອູນ ໂມເດີສ໌ໂຕ ກາສໂຕຣຣຸສ໌, ຜູ້ນຳຂອງກູບາໄດ້ປະກາດໃນເວລາດຽວກັນວ່າຈະເລີ່ມຕົ້ນຂະບວນການຟື້ນຟູການພົວພັນລະຫວ່າງສອງປະເທດຄືນສູ່ປົກກະຕິ. ລັດຖະບານບາຣັກ ໂອບາມາໄດ້ປະກາດໃນປີນີ້ວ່າຈະຜ່ອນຄາຍຄວາມຈຳກັດດ້ານການທ່ອງທ່ຽວແລະການຄ້າຕໍ່ກູບາ, ໃນນັ້ນ, ລວມທັງການອະນຸຍາດໃຫ້ຜູ້ທີ່ຈະໄປຢ້ຽມຢາມຄອບຄົວຫຼືຍາດຕິພີ່ນ້ອງແລະຜູ້ເຂົ້າຮ່ວມກິດຈະກຳດ້ານການສຶກສາແລະອື່ນໆທັງໝົດ 12 ຈຳພວກເດີນທາງໄປກູບາ.