ພາຍຫຼັງເນປານໄດ້ເກີດໄພແຜ່ນດິນໄຫວຂະໜາດ 8,1 ລິກເຕີແລ້ວ, ຍ້ອນໄດ້ຮັບຜົນກະທົບຈາກໄພພິບັດແຜ່ນດິນໄຫວໃນຄັ້ງນີ້, ເມືອງຢາດົງ ນະຄອນຊີກາເຊເຂດຕິເບດຂອງຈີນກໍ່ໄດ້ປະສົບແຮງສັ່ນສະເທືອນຢ່າງຮ້າຍແຮງ. ຕາມການລາຍງານຂ່າວໃນວັນທີ 5 ພຶດສະພານີ້ວ່າ, ຜ່ານວຽກງານກູ້ໄພຢ່າງເຄັ່ງຮ້ອນໃນໄລຍະໜຶ່ງ, ພາຍຫຼັງການກໍາຈັດປັດເປົ່າໄພອັນຕະລາຍທີ່ແອບແຝງດ້ານຄວາມປອດໄພທຸກປະການແລ້ວ, ອີງຕາມສັນຍາທີ່ກ່ຽວຂ້ອງລະຫວ່າງຈີນກັບອິນເດຍ, ດ່ານຢາດົງ ເຊິ່ງເປັນດ່ານການຄ້າຊາຍແດນພຽງດ່ານດຽວທີ່ຢູ່ຊາຍແດນທາງບົກຈີນ-ອິນເດຍນັ້ນ ໄດ້ເປີດການນໍາໃຊ້ຢ່າງເປັນທາງການແລ້ວໃນວັນທີ 4 ພຶດສະພານີ້, ການຄ້າຊາຍແດນກໍ່ໄດ້ເລີ່ມຂຶ້ນໄປພ້ອມໆກັນ.
ຄະນະກໍາມະການການຄ້າຊາຍແດນຢາດົງເຜີຍໃຫ້ຮູ້ວ່າ, ໃນວັນທີ 4 ພຶດສະພານີ້ ເຊິ່ງເປັນມື້ເປີດການນໍາໃຊ້ດ່ານດັ່ງກ່າວ, ຜູ້ຕາງໜ້າຂອງສະມາຄົມການຄ້າຂອງຝ່າຍຈີນຈໍານວນ 17 ຄົນ ໄດ້ເດີນທາງໄປເຖິງຕະຫຼາດຊາງກູຂອງອິນເດຍ ເພື່ອດໍາເນີນການເຈລະຈາກັບສະມາຄົມການຄ້າຂອງຝ່າຍອິນເດຍກ່ຽວກັບລາຄາສິນຄ້າ, ບັນຊີລາຍຊື່ຂອງສິນຄ້າ, ອັດຕາແລກປ່ຽນເງິນຢວນກັບເງິນຣູປີອິນເດຍ ແລະບັນຫາອື່ນໆ, ສອງຝ່າຍໄດ້ບັນລຸຄວາມເຫັນທີ່ເປັນເອກະສັນກັນ.
