ວັນທີ 6 ພຶດສະພານີ້, ທ່ານຫຼິວຮວາຢວນ, ປະທານສະມາຄົມນິຕິສາດໄທ-ຈີນ, ທີ່ປຶກສາກະຊວງຍຸຕິທຳໄທໄດ້ໃຫ້ສຳພາດຕໍ່ນັກຂ່າວໂດຍ ກ່າວວ່າ: ການຕ້ານການ ສໍ້ລາດບັງຫຼວງເປັນບັນຫາຂອງທົ່ວໂລກ, ການນຳຈັບຜູ້ກະທຳຜິດກົດໝາຍທີ່ໂຕນໜີໄປຢູ່ຕ່າງປະເທດເພາະທວງຄືນຂອງກາງຂອງເຂົາເຈົ້າຄວນເພີ່ມທະວີການຮ່ວມມືໃນຫຼາຍຊ່ອງທາງ.
ທ່ານຫຼິວຮວາຢວນກ່າວວ່າ: ປະຈຸບັນ, ປະເທດຕ່າງໆໄດ້ອາໄສເຊິ່ງກັນແລະກັນ, ແລະມີຜົນປະໂຫຍດທີ່ສະຫຼັບກັນ. ການຕ້ານການ ສໍ້ລາດບັງຫຼວງຕ້ອງໃຫ້ປະເທດຕ່າງໆໃນທົ່ວໂລກຮ່ວມມືກັນຢ່າງໃກ້ຊິດ, ມີແຕ່ເຮັດແນວນີ້, ຈຶ່ງຈະສາມາດນຳຈັບບຸກຄົນທີ່ກ່ຽວຂ້ອງມາລົງໂທດຕາມກົດໝາຍໄດ້. ທ່ານເຫັນວ່າ: ນອກຈາກຊ່ອງທາງການຕ່າງປະເທດທີ່ເປັນທາງການແລ້ວ, ການນຳຈັບຜູ້ກະທຳຜິດກົດໝາຍທີ່ໂຕນໜີໄປຢູ່ຕ່າງປະເທດຍັງສາມາດເພີ່ມທະວີການຮ່ວມມືໃນຫຼາຍຊ່ອງທາງ, ເຊິ່ງລວມທັງການເສີມຂະຫຍາຍກຳລັງພາກປະຊາຊົນໃຫ້ຫຼາຍກວ່າເກົ່າ.
ທ່ານຫຼິວຮວາຢວນສະເໜີວ່າ: ຈີນມີຄວາມຈຳເປັນເຊັນສົນທິສັນຍາວ່າດ້ວຍການສົ່ງຜູ້ຮ້າຍຂ້າມແດນກັບປະເທດຕ່າງໆໃຫ້ຫຼາຍກວ່າເກົ່າ, ຂະນະດຽວກັນນີ້, ຕ້ອງປັບປຸງແລະເພີ່ມຄວາມເຂັ້ມງວດໃນການປະຕິບັດກົດໝາຍວ່າດ້ວຍການຕ້ານການຟອກເງິນຕື່ມອີກ, ຈຶ່ງຈະສາມາດຫຼຸດກໍລະນີທີ່ເຈົ້າໜ້າທີ່ຜູ້ກະທຳຜິດຍ້າຍຄອບຄົວແລະຊັບສິນໄປຢູ່ຕ່າງປະເທດໃຫ້ໜ້ອຍລົງ, ທັງຕັດເສັ້ນທາງຫຼັງຜູ້ສໍ້ລາດບັງຫຼວງ, ແລະເປັນການສ້າງຄວາມກົດດັນອັນໃຫຍ່ຫຼວງຕໍ່ຄົນຈຳພວກນີ້.