ພາຍຫຼັງເກີດໄພແຜ່ນດິນໄຫວທີ່ຮຸນແຮງໃນວັນທີ 25 ເມສາທີ່ຜ່ານມາ, ລັດຖະບານເນປານກ່າວວ່າ, ປັດຈຸບັນ ເກືອບບໍ່ມີຄວາມອາດເປັນໄປໄດ້ທີ່ຄົ້ນພົບຜູ້ລອດຊີວິດໃນຊາກເພພັງແລ້ວ, ສະນັ້ນ, ຈຶ່ງກຽມສິ້ນສຸດການເຄື່ອນໄຫວຄົ້ນຫາແລະຊ່ວຍເຫຼືອ, ແລະຫັນວຽກງານຈຸດໜັກໄປສູ່ການຊ່ວຍເຫຼືອປະຊາຊົນຜູ້ປະສົບໄພ, ຟື້ນຟູແລະສ້າງສາຄືນໃໝ່. ວັນທີ 4 ພຶດສະພານີ້, ເຈົ້າໜ້າທີ່ເນປານກ່າວວ່າ, ການສ້າງສາຄືນໃໝ່ຫຼືການຟື້ນຟູຫຼັງໄພພິບັດຕ້ອງການຄວາມຊ່ວຍເຫຼືອຈາກສາກົນ 1 ຕື້ 800 ລ້ານໂດລາ, ລັດຖະບານເນປານມີເຈຕະນາຢາກຈະຂໍຄວາມຊ່ວຍເຫຼືອດ້ານການເງິນຈາກທະນາຄານລົງທຶນພື້ນຖານໂຄງລ່າງອາຊີ ຫຼື AIIB ທີ່ກຽມຈະສ້າງຕັ້ງຂຶ້ນ.
ທ່ານຣາມ ຊາຣັນ ມາຮັດ, ລັດຖະມົນຕີວ່າການກະຊວງການເງິນຂອງເນປານກ່າວວ່າ, ປັດຈຸບັນ, ລັດຖະບານພວມຄິດໄລ່ຄ່າໃຊ້ຈ່າຍທີ່ຕ້ອງການໃນການປຸກເຮືອນໃໝ່, ສ້ອມແປງລະບົນຖະໜົນຫົນທາງແລະມໍລະດົກໂລກ, ແລ້ວຈະຂໍຄວາມຊ່ວຍເຫຼືອດ້ານການເງິນຈາກທະນາຄານ AIIB.
ອີງຕາມແຜນການວຽກງານກຽມສ້າງຕັ້ງທະນາຄານ AIIB, ອົງການພັດທະນາຫຼາຍຝ່າຍຂອງພາກພື້ນອາຊີດັ່ງກ່າວ ຈະສ້າງຕັ້ງຂຶ້ນຢ່າງເປັນທາງການກ່ອນທ້າຍປີນີ້. ສຳນັກຂ່າວສານກຽວໂດຍີ່ປຸ່ນແຈ້ງຂ່າວວ່າ, ເນປານອາດຈະກາຍເປັນລູກຄ້າລາຍທຳອິດຂອງທະນາຄານ AIIB.