ໂດຍຕອບສະໜອງຕາມຄຳເຊີນຂອງທ່ານນາງໄມເຄນ ບາເຊເລັດ, ປະທານາທິບໍດີຈີເລ, ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ເດີນທາງໄປຮອດສະໜາມບິນສາກົນຊັງຕີອາໂກດ້ວຍຍົນພິເສດໃນຕອນບ່າຍວັນທີ 24 ພຶດສະພານີ້ຕາມເວລາທ້ອງຖິ່ນ, ໂດຍໄດ້ເລີ່ມຢ້ຽມຢາມຈີເລຢ່າງເປັນທາງການ. ທ່ານເຮຣານໂດ ມູນົສ, ລັດຖະມົນຕີວ່າການກະຊວງການຕ່າງປະເທດ ແລະ ເຈົ້າໜ້າທີ່ຂັ້ນສູງທ່ານອື່ນໆຂອງລັດຖະບານຈີເລໄດ້ໃຫ້ກຽດຕ້ອນຮັບທ່ານຫຼີເຄີ້ສຽງ.
ໂອກາດນີ້, ທ່ານຫຼີເຄີ້ສຽງ ກ່າວວ່າ: ຈີເລແມ່ນປະເທດທຳອິດໃນທະວີບອາເມລິກາໃຕ້ທີ່ສ້າງສາຍພົວພັນທາງການທູດກັບປະເທດຈີນໃໝ່, ແລະແມ່ນປະເທດທຳອິດໃນທະວີບອາເມລິກາລາຕິນທີ່ໄດ້ຮ່ວມກັບຈີນລົງນາມໃນສັນຍາການຄ້າເສລີ, ການຂະຫຍາຍການພົວພັນກັບຈີນຂອງຈີເລໄດ້ເດີນຢູ່ໃນແຖວໜ້າຂອງບັນດາປະເທດພາກພື້ນນີ້. ການມາຢ້ຽມຢາມຂອງຂ້າພະເຈົ້າໃນຄັ້ງນີ້ແມ່ນເພື່ອຮ່ວມກັບຝ່າຍຈີເລໃນການປັບປຸງໄມຕີຈິດມິດຕະພາບອັນເປັນມູນເຊື້ອ ແລະ ລົງເລິກການໄວ້ເນື້ອເຊື່ອໃຈກັນທາງດ້ານການເມືອງລະຫວ່າງສອງປະເທດ, ຍົກລະດັບການຮ່ວມມືໃນຂົງເຂດຕ່າງໆລະຫວ່າງຈີນ-ຈີເລ ເຊັ່ນ: ເຂດການຄ້າເສລີ, ການທະນາຄານ, ຄວາມສາມາດການຜະລິດ, ການຜະລິດເຄື່ອງອຸປະກອນ ແລະ ການກໍ່ສ້າງພື້ນຖານໂຄງລ່າງໃຫ້ສູງຂຶ້ນ, ຫັນປ່ຽນຄວາມສາມາດບົ່ມຊ້ອນດ້ານການລົງເລິກການຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃຫ້ກາຍເປັນພະລັງແຮງແຫ່ງການພັດທະນາໄວຍິ່ງຂຶ້ນຮ່ວມກັນຂອງສອງປະເທດ, ເຮັດໃຫ້ການພົວພັນຄູ່ຮ່ວມຍຸດທະສາດລະຫວ່າງຈີນ-ຈີເລກ້າວເດີນໄປສູ່ເປົ້າໝາຍທີ່ສູງກວ່າເກົ່າຈາກຈຸດເລີ່ມຕົ້ນໃໝ່.
ໃນໄລຍະຢູ່ຢ້ຽມຢາມ, ທ່ານຫຼີເຄີ້ສຽງ ຈະພົບປະເຈລະຈາກັບທ່ານນາງໄມເຄນ ບາເຊເລັດ, ປະທານາທິບໍດີຈີເລ ແລະ ຮ່ວມກັນເຂົ້າຮ່ວມງານຖະແຫຼງຂ່າວຕໍ່ສື່ມວນຊົນ, ພ້ອມທັງຈະຮ່ວມກັນເຂົ້າຮ່ວມກອງປະຊຸມສຳມະນາເສດຖະກິດການຄ້າ ແລະ ກອງປະຊຸມຄະນະກຳມະການນັກທຸລະກິດຈີນ-ຈີເລຄັ້ງທີ 7 ເນື່ອງໃນໂອກາດຈີນ-ຈີເລຮ່ວມກັນສ້າງສາຍພົວພັນທາງການທູດຄົບຮອບ 45 ປີ. ນອກຈາກນີ້, ທ່ານຫຼີເຄີ້ສຽງ ຍັງຈະກ່າວຄຳປາໄສໃນຄະນະກຳມະການເສດຖະກິດອາເມລິກາລາຕິນ-ກາຣາອິບຕາມຄຳເຊີນນຳອີກ.