ໂອກາດເຂົ້າຮ່ວມກອງປະຊຸມສົນທະນາຂະແໜງການເຊື່ອມໂຍງເຊື່ອມຈອດກັນອາຊີເອີຣົບທີ່ຈັດຂຶ້ນໃນວັນທີ 27 ພຶດສະພານີ້ຢູ່ນະຄອນຈຸ່ງກິ່ງແຂວງເສສວນຂອງຈີນ, ທ່ານໂດມີນິກ ເດ ວິວປີນ ອະດີດນາຍົກລັດຖະມົນຕີຝະຣັ່ງກ່າວວ່າ: "ໜຶ່ງແລວທາງໜຶ່ງເສັ້ນທາງ" ເປັນຂົວຕໍ່ລະຫວ່າງຈີນ-ເອີຣົບ ເຊິ່ງສາມາດສົ່ງເສີມການຮ່ວມມືສອງຝ່າຍແລະກຳຈັດການປະທະກັນ.
ໃນເວລາປະກອບຄຳຄິດຄຳເຫັນຢູ່ທີ່ປະຊຸມ, ທ່ານເດວິວປີນກ່າວເນັ້ນວ່າ: ຈີນແລະເອີຣົບສາມາດດຳເນີນການຮ່ວມມືໄດ້ໃນຫຼາຍຂົງເຂດ. ຈັງຫວະການເຕີບໂຕດ້ານເສດຖະກິດຂອງຈີນກຳລັງຊ້າລົງ, ຈີນຕ້ອງການໃນການສ້າງປະເທດໃຫຍ່ດ້ານຂະແໜງການຜະລິດທີ່ອາໄສການສົ່ງອອກນັ້ນໃຫ້ເປັນປະເທດແບບບໍລິການທີ່ທັນສະໄໝ, ຈີນແລະເອີຣົບສາມາດແບ່ງປັນບົດຮຽນໃນດ້ານນີ້.
ພ້ອມດຽວກັນນັ້ນ, ທ່ານເດວິວປີນຍັງໄດ້ຢືນຢັນຕໍ່ທະນາຄານການລົງທຶນພື້ນຖານໂຄງລ່າງອາຊີເຊິ່ງແມ່ນຈີນເປັນຜູ້ລິເລີ່ມສ້າງຕັ້ງ. ທ່ານກ່າວວ່າ: ເພື່ອຊຸກຍູ້ການເຊື່ອມໂຍງເຊື່ອມຈອດກັນ, ຈີນເອີຣົບຕ້ອງປັບປຸງຮູບແບບການຮ່ວມມື. ເວົ້າໃນດ້ານນີ້ແລ້ວ, ທະນາຄານການລົງທຶນພື້ນຖານໂຄງລ່າງອາຊີເປັນຜົນສຳເລັດອັນໃຫຍ່ຫຼວງ. ຈີນແລະເອີຣົບສາມາດເພີ່ມທະວີການຮ່ວມມືຕື່ມອີກໃນດ້ານມາດຕະຖານເຕັກນິກແລະການຕິດຕາມຄຸ້ມຄອງເພື່ອສ້າງຕະຫຼາດຮ່ວມຈີນເອີຣົບອັນໃຫຍ່ແລະສົ່ງເສີມການເຊື່ອມໂຍງເຊື່ອມຈອດກັນຂອງບັນດາຝ່າຍ.