ຈີນເປັນປະເທດກິດຕິມະສັກຂອງ "ເວທີປຶກສາຫາລືການຕະຫຼາດທົ່ວໂລກ" 2015 ຂອງງານວາງສະແດງປື້ມອາເມລິກາ, ແລະໄດ້ຈັດກິດຈະກຳໃນຖານະເປັນປະເທດກິດຕິມະສັກຂຶ້ນຢ່າງເປັນທາງການຢູ່ທີ່ນິວຢອກໃນວັນທີ 27 ພຶດສະພານີ້.
ນີ້ແມ່ນກິດຈະກຳແລກປ່ຽນໃນຂະແໜງການພິມຈຳໜ່າຍທີ່ມີຂະໜາດໃຫຍ່ທີ່ສຸດທີ່ຈີນຈັດຂຶ້ນຢູ່ອາເມລິການັບຕັ້ງແຕ່ສອງປະເທດໄດ້ສ້າງສາຍພົວພັນທາງການທູດເປັນຕົ້ນມາ, ແລະກໍ່ແມ່ນກິດຈະກຳແລກປ່ຽນວັດທະນະທຳທີ່ສຳຄັນຄັ້ງໜຶ່ງທີ່ຈັດຂຶ້ນພາຍໃຕ້ຂອບກົນໄກປຶກສາຫາລືການແລກປ່ຽນວັດທະນະທຳລະດັບສູງຈີນ-ອາເມລິກາໃນປີນີ້.
ຫົວຂໍ້ຂອງກິດຈະກຳຄັ້ງນີ້ແມ່ນ "ສຳຜັດແລະສ້າງຄວາມຮູ້ສຶກກັບຈີນ, ສ້າງອະນາຄົດຮ່ວມກັນ", ເຊິ່ງມີກົມໃຫຍ່ຖະແຫຼງຂ່າວ, ພິມຈຳໜ່າຍ, ວິທະຍຸ, ຮູບເງົາ ແລະ ໂທລະພາບແຫ່ງຊາດຈີນເປັນເຈົ້າພາບ, ແລະຮ່ວມມືໂດຍກຸ່ມບໍລິສັດນຳເຂົ້າ-ສົ່ງອອກປື້ມຈີນ ແລະ ບໍລິສັດພັດທະນາຖະແຫຼງຂ່າວແລະການພິມຈຳໜ່າຍຮອບໂລກຈຳກັດ.
ທ່ານອູຊາງຈື່, ຮອງຫົວໜ້າກົມໃຫຍ່ຖະແຫຼງຂ່າວ, ພິມຈຳໜ່າຍ, ວິທະຍຸ, ຮູບເງົາ ແລະ ໂທລະພາບແຫ່ງຊາດຈີນ ໄດ້ກ່າວເປີດພິທີ ໂດຍກ່າວວ່າ: ຫວັງວ່າວົງການພິມຈຳໜ່າຍຂອງສອງປະເທດຈີນແລະອາເມລິກາຈະແປແລະພິມຈຳໜ່າຍປື້ມທີ່ດີເດັ່ນໃຫ້ຫຼາຍກວ່າເກົ່າອີກ, ເພື່ອສະໜອງການບໍລິໂພກທາງດ້ານຈິດໃຈທີ່ອຸດົມສົມບູນຍິ່ງຂຶ້ນໃຫ້ແກ່ຜູ້ອ່ານ, ແລະຂຽນປະຫວັດສາດໜ້າໃໝ່ແຫ່ງການພົວພັນລະຫວ່າງຈີນ-ອາເມລິກາໃຫ້ອະລັງການ.