ຕາມຂ່າວCRI: ວັນທີ 28 ສິງຫານີ້, ທ່ານສີຈິ້ນຜິງ, ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານນາງຊູຊານ ໄຣສ, ຜູ້ຊ່ວຍປະທານາທິບໍດີອາເມລິກາທາງດ້ານວຽກງານຄວາມໝັ້ນຄົງແຫ່ງຊາດຢູ່ຫໍສະພາປະຊາຊົນໃຫຍ່.
ທ່ານສີຈິ້ນຜິງຊີ້ອອກວ່າ, ນັບແຕ່ຕົ້ນປີນີ້ມາ, ຈີນກັບອາເມລິກາໄດ້ຮັກສາການໄປມາຫາສູ່ກັນຢ່າງແໜ້ນແຟ້ນໃນແຕ່ລະລະດັບ. ງານສົນທະນາດ້ານຍຸດທະສາດແລະເສດຖະກິດລະຫວ່າງຈີນກັບອາເມລິກາຮອບທີ 7 ແລະການປຶກສາຫາລືລະດັບສູງກ່ຽວກັບການແລກປ່ຽນດ້ານວັດທະນະທຳລະຫວ່າງຈີນກັບອາເມລິກາຮອບທີ 6 ໄດ້ຮັບຜົນສຳເລັດຢ່າງອຸດົມສົມບູນ. ສອງປະເທດໄດ້ຮັບຄວາມຄືບໜ້າຢ່າງຕັ້ງໜ້າໃນການຮ່ວມມືໃນຂົງເຂດສຳຄັນຕ່າງໆ. ຈີນກັບອາເມລິກາມີຜົນປະໂຫຍດຮ່ວມກັນຢ່າງກວ້າງຂວາງແລະກຳລັງບົ່ມຊ້ອນດ້ານການຮ່ວມມືຢ່າງໃຫຍ່ຫຼວງ. ການພົວພັນລະຫວ່າງຈີນກັບອາເມລິກາທີ່ມີຄວາມໝັ້ນທ່ຽງ, ພັດທະນາຢ່າງຕໍ່ເນື່ອງບໍ່ພຽງແຕ່ສອດຄ່ອງກັບຜົນປະໂຫຍດ ພື້ນຖານຂອງສອງປະເທດແລະປະຊາຊົນສອງຊາດເທົ່ານັ້ນຍັງມີຜົນດີຕໍ່ການປົກປັກຮັກສາສັນຕິພາບແລະການພັດທະນາຂອງອາຊີປາຊີຟິກກໍ່ຄືຂອງໂລກ. ພວກເຮົາຍິນດີພະຍາຍາມຮ່ວມກັນກັບອາເມລິກາ, ບຸກເບີກການຮ່ວມມືຕົວຈິງໃນຂົງເຂດຕ່າງໆເຊັ່ນສອງຝ່າຍ, ພາກພື້ນແລະທົ່ວໂລກຢ່າງຕໍ່ເນື່ອງ, ຄວບຄຸມບັນຫາທີ່ອ່ອນໄຫວດ້ວຍຮູບແບບທີ່ມີລັກສະນະສ້າງສັນ, ພະຍາຍາມເຮັດໃຫ້ການພົວພັນລະຫວ່າງຈີນກັບອາເມລິກາສ້າງຜົນປະໂຫຍດຫຼາຍກວ່າເກົ່າໃຫ້ແກ່ປະຊາຊົນສອງປະເທດແລະປະຊາຊົນປະເທດຕ່າງໆຂອງໂລກ.
ທ່ານສີຈິ້ນຜິງຍັງໄດ້ຊີ້ອອກວ່າ, ໂດຍຕອບສະໜອງຕາມການເຊື້ອເຊີນຂອງທ່ານບາຣັກ ໂອບາມາ, ປະທານາທິບໍດີອາເມລິກາ, ຂ້າພະເຈົ້າຈະເດີນທາງໄປຢ້ຽມຢາມອາເມລິກາທາງລັດຖະກິດໃນເດືອນໜ້າ. ຂ້າພະເຈົ້າຍິນດີແລກປ່ຽນຄວາມເຫັນຢ່າງເລິກເຊິ່ງກ່ຽວກັບບັນຫາສຳຄັນທີ່ສອງຝ່າຍສົນໃຈຮ່ວມກັນກັບທ່ານບາຣັກ ໂອບາມາ, ຮ່ວມກັນປຶກສາຫາລືກ່ຽວກັບວຽກງານທີ່ເພີ່ມທະວີມິດຕະພາບລະຫວ່າງປະຊາຊົນສອງປະເທດ, ຊຸກຍູ້ການຮ່ວມມືໃນທຸກຂົງເຂດລະຫວ່າງສອງຝ່າຍ, ສ້າງຜົນປະໂຫຍດຫຼາຍກວ່າເກົ່າໃຫ້ແກ່ສອງປະເທດແລະປະຊາຊົນສອງຊາດ.
ທ່ານນາງຊູຊານ ໄຣສກ່າວວ່າ, ການເດີນທາງມາຢ້ຽມຢາມຂອງຂ້າພະເຈົ້າໃນຄັ້ງນີ້ແມ່ນເພື່ອທຳການກະກຽມໃຫ້ແກ່ການເດີນທາງໄປຢ້ຽມຢາມອາເມລິກາທາງລັດຖະກິດໃນເດືອນໜ້າຂອງທ່ານປະທານສີຈິ້ນຜິງໂດຍຈຳເພາະ. ທ່ານບາຣັກ ໂອບາມາ, ປະທານາທິບໍດີອາເມລິກາຄອງຄອຍຈະສືບຕໍ່ແລກປ່ຽນຄວາມເຫັນຢ່າງເລິກເຊິ່ງກ່ຽວກັບການພົວພັນລະຫວ່າງສອງປະເທດແລະບັນຫາສາກົນສຳຄັນທີ່ສອງຝ່າຍສົນໃຈຮ່ວມກັນ.