ສຳນັກຂ່າວສານຊິນຮວາລາຍງານວ່າ: ຕອນເຊົ້າວັນທີ 1 ກັນຍານີ້,ຢູ່ຫໍສະພາປະຊາຊົນແຫ່ງຊາດຈີນນະຄອນຫຼວງປັກກິ່ງ, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນໄດ້ພົບປະກັບທ່ານລຽນຈ້ານ ປະທານກິດຕິມະສັກຂອງພັກກົກມັນຕັງຈີນ ແລະຜູ້ຕາງໜ້າອື່ນໆຈາກວົງການຕ່າງໆຂອງໄຕ້ຫວັນທີ່ໄດ້ເດີນທາງມາເຂົ້າຮ່ວມກິດຈະກຳລະນຶກວັນຄົບຮອບ 70 ປີແຫ່ງໄຊຊະນະສົງຄາມຕໍ່ຕ້ານຟາຊິດຍີ່ປຸ່ນຂອງປະຊາຊົນຈີນແລະສົງຄາມຕໍ່ຕ້ານຟາຊິດຂອງໂລກ. ໂອກາດດັ່ງກ່າວ, ທ່ານສີຈິ້ນຜິງ ກ່າວເນັ້ນວ່າ: ພີ່ນ້ອງຮ່ວມຊາດສອງຝັ່ງຊ່ອງແຄບໄຕ້ຫວັນຄວນຈື່ຈຳປະຫວັດສາດ, ສາມັກຄີເປັນຈິດໜຶ່ງໃຈດຽວກັນ, ຮ່ວມມືກັນຊຸກຍູ້ສາຍພົວພັນລະຫວ່າງສອງຝັ່ງໃຫ້ພັດທະນາໂດຍສັນຕິ, ທຳຄວາມພະຍາຍາມຮ່ວມກັນເພື່ອຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນຄືນໃໝ່.
ທ່ານລຽນຈ້ານກ່າວວ່າ: ປະຊາຊົນສອງຝັ່ງຊ່ອງແຄບໄຕ້ຫວັນລ້ວນແຕ່ເປັນຊົນຊາດຈີນດຽວກັນ. ພວກເຮົາຮ່ວມກັນລະນຶກໄຊຊະນະແຫ່ງສົງຄາມຕໍ່ຕ້ານຟາຊິດຍີ່ປຸ່ນເປັນການທົບທວນຄືນປະຫວັດສາດອັນສະຫງ່າຍິ່ງໃຫຍ່ແລະອົງອາດກ້າຫານທີ່ທົ່ວທັງຊາດຕໍ່ຕ້ານການຮຸກຮານຂອງຊາດພາຍນອກດ້ວຍການເສຍສະຫຼະເລືອດເນື້ອແລະຊີວິດ, ພ້ອມກັນສົ່ງເສີມອຸດົມການອັນດີງາມຂອງຊາວໂລກໃຫ້ຮັກຫອມສັນຕິພາບແລະຕໍ່ຕ້ານການຮຸກຮານ. ພວກເຮົາຄວນປັບປຸງພື້ນຖານແຫ່ງຄວາມໄວ້ເນື້ອເຊື່ອໃຈກັນລະຫວ່າງສອງຝັ່ງໃຫ້ໝັ້ນຄົງຄືການຍຶດໝັ້ນປະຕິບັດ "ຄວາມຮັບຮູ້ທີ່ເປັນເອກະສັນກັນປີ 1992", ແລະຄັດຄ້ານການແບ່ງແຍກໄຕ້ຫວັນໃຫ້ເປັນເອກະລາດ, ຄວນເດັດດ່ຽວຊຸກຍູ້ການຊ່ວຍເຫຼືອແລະຮ່ວມມືກັນເພື່ອໃຫ້ຕ່າງຝ່າຍຕ່າງໄດ້ຮັບຜົນປະໂຫຍດນຳກັນ, ເຮັດໃຫ້ວົງການຕ່າງໆຂອງໄຕ້ຫວັນໄດ້ມີຄວາມຮັບຮູ້ຫຼາຍຂຶ້ນແລະປະ ກອບສ່ວນເຂົ້າໃນການຊຸກຍູ້ສາຍພົວພັນລະຫວ່າງສອງຝັ່ງໃຫ້ພັດທະນາໂດຍສັນຕິ.