ວັນທີ 31 ສິງຫາແລ້ວນີ້ ທີ່ນະຄອນຫຼວງປັກກິ່ງ, ທ່ານສີຈິ້ນຜິງ, ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ ໄດ້ພົບປະເຈລະຈາກັບທ່ານຈູມມາລີ ໄຊຍະສອນ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວ ເນື່ອງໃນໂອກາດທີ່ທ່ານເດີນທາງມາເຂົ້າຮ່ວມກິດຈະກຳລະນຶກວັນຄົບຮອບ 70 ປີແຫ່ງໄຊຊະນະຂອງສົງຄາມປະ ຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນ ແລະ ສົງຄາມຕໍ່ຕ້ານຟາຊິດຂອງໂລກ.
ໂອກາດນີ້, ທ່ານສີຈິ້ນຜິງ ໄດ້ຕາງໜ້າພັກ ແລະ ລັດຖະບານຈີນສະແດງຄວາມຂອບໃຈຕໍ່ພັກ ແລະ ລັດຖະບານລາວ ທີ່ໃຫ້ການສະໜັບສະໜູນຢ່າງໃຫຍ່ຕໍ່ຝ່າຍຈີນໃນການຈັດກິດຈະກຳລະນຶກໃນຄັ້ງນີ້. ທ່ານກ່າວວ່າ: ຈີນແລະລາວລ້ວນແຕ່ແມ່ນປະເທດປະສົບເຄາະຮ້າຍຈາກສົງຄາມໂລກຄັ້ງທີ 2, ປະຊາຊົນສອງຊາດໄດ້ຄຽງບ່າຄຽງໄຫຼ່ໃນການສູ້ຮົບ ແລະ ຜູກພັນໄມຕີຈິດມິດຕະພາບອັນເລິກເຊິ່ງໃນຂະບວນການຮ່ວມກັນຕໍ່ຕ້ານການຮຸກຮານ ແລະ ຍາດແຍ່ງການເປັນເອກະລາດຂອງຊົນຊາດຕົນ. ພວກຂ້າພະເຈົ້າຍິນດີຮ່ວມກັນກັບບັນດາປະເທດໃນໂລກ ເຊິ່ງລວມທັງລາວ ເພື່ອປະກອບສ່ວນອັນໃຫຍ່ຫຼວງກວ່າເກົ່າເຂົ້າໃນການສ້າງສັນຕິພາບແລະການພັດທະນາຂອງພາກພື້ນແລະຂອງໂລກ.
ທ່ານສີຈິ້ນຜິງ ກ່າວເນັ້ນວ່າ: ຝ່າຍຈີນຍິນດີຕັ້ງໜ້າຊຸກຍູ້ການສ້າງ "ໜຶ່ງແລວທາງໜຶ່ງເສັ້ນທາງ" ໃຫ້ເຊື່ອມຕໍ່ກັບຍຸດທະສາດພັດທະນາຂອງຝ່າຍລາວຢ່າງມີປະສິດທິຜົນ, ດຳເນີນການຮ່ວມມືແບບຕ່າງຝ່າຍຕ່າງມີຜົນປະໂຫຍດທາງດ້ານຄວາມສາມາດໃນການຜະລິດ, ເຮັດໃຫ້ຜົນປະໂຫຍດຮ່ວມລະຫວ່າງສອງຝ່າຍຍົກສູງຂຶ້ນຮອດລະດັບສູງກວ່າເກົ່າອີກ, ສ້າງປະຊາຄົມຮ່ວມຊາຕາກຳຈີນ-ລາວທີ່ບໍ່ສາມາດແບ່ງແຍກໄດ້.
ທ່ານຈູມມາລີ ໄຊຍະສອນ ໄດ້ຕີລາຄາສູງຕໍ່ປະຊາຊົນຈີນທີ່ໄດ້ປະກອບສ່ວນອັນໃຫຍ່ຫຼວງໃນສົງຄາມໂລກຄັ້ງທີ 2 ແລະ ໄມຕີຈິດມິດຕະພາບອັນເລິກເຊິ່ງລະຫວ່າງປະຊາຊົນສອງຊາດລາວ-ຈີນທີ່ໄດ້ຜູກພັນກັນໃນການຄຽງບ່າຄຽງໄຫຼ່ສູ້ຮົບໃນສະໄໝສົງຄາມ. ທ່ານກ່າວຕື່ມວ່າ: ຫວັງວ່າສອງຝ່າຍຈະສືບຕໍ່ຮັກສາການໄປມາຫາສູ່ຢ້ຽມຢາມກັນຢ່າງໃກ້ຊິດລະຫວ່າງການນຳຂັ້ນສູງ, ລົງເລິກການແລກປ່ຽນບົດຮຽນດ້ານການກໍ່ສ້າງພັກ, ເພີ່ມທະວີການປະສານງານແລະປະສານສົມທົບກັນຢ່າງແໜ້ນແຟ້ນໃນວຽກງານສາກົນແລະພາກພື້ນ.
