ຕອນຄ່ຳວັນທີ 31 ສິງຫາແລ້ວນີ້, ສະຖານທູດຈີນປະຈຳຍີ່ປຸ່ນໄດ້ຈັດງານລ້ຽງຮັບຮອງ ເພື່ອລະນຶກວັນຄົບຮອບ 70 ປີແຫ່ງໄຊຊະນະຂອງສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນ ແລະ ສົງຄາມຕໍ່ຕ້ານຟາຊິດຂອງໂລກ. ທ່ານເສິງຢົງຮວາ, ເອກອັກຄະລັດຖະທູດຈີນປະຈຳຍີ່ປຸ່ນ ໄດ້ກ່າວຄຳປາໄສ ໂດຍໄດ້ສະຫຼຸບບົດຮຽນທາງລົບອັນເລິກເຊິ່ງຈາກສົງຄາມ, ລະລຶກແລະອາໄລຫາຜູ້ເສຍສະຫຼະຊີວິດອັນລ້ຳຄ່າຢ່າງກ້າຫານເພື່ອປົກປັກຮັກສາຄວາມເປັນທຳແລະສັນຕິພາບ, ແລະຮ່ວມກັນຈ້ອງມອງອະນາຄົດຂອງປະຊາຄົມໂລກທີ່ມີສັນຕິພາບຖາວອນ.
ທ່ານເສິງຢົງຮວາ ກ່າວວ່າ: ແປວໄຟສົງຄາມໃນຄາວນັ້ນໄດ້ເພີກຫາຍໄປໝົດແລ້ວ, ແຕ່ຄວາມເປັນທຳ ແລະ ມະໂນທຳຈະບໍ່ເພີກຫາຍຈົນເທົ່າໃດໆ. ພວກເຮົາຄວນປົກປັກຮັກສາຄວາມເປັນທຳ ແລະ ມະໂນທຳ ດ້ວຍຄວາມຊື່ສັດແລະຄວາມຈິງອົກຈິງໃຈ, ທົບທວນຄືນມະຫັນຕະໄພທີ່ມວນມະນຸດໄດ້ປະສົບໃນ 70 ກວ່າປີກ່ອນ, ແລະຖອດຖອນບົດຮຽນທາງລົບຈາກມະຫັນຕະໄພໃນຄາວນັ້ນ, ສ້າງກຳແພງອັນໝັ້ນແກ່ນເພື່ອປ້ອງກັນບໍ່ໃຫ້ໂສກນາດຕະກຳຈາກສົງຄາມເກີດຂຶ້ນອີກ.
ທ່ານເສິງຢົງຮວາ ຊີ້ອອກວ່າ: ຝ່າຍຈີນໄດ້ສະແດງໃຫ້ເຫັນເຖິງຄວາມໃຈກວ້າງແລະໂອບອ້ອມອາລີທີ່ປະຊາຊົນໃນທົ່ວໂລກຍາກທີ່ຄິດອອກໄດ້ໃນການແກ້ໄຂບັນຫາຕ່າງໆພາຍຫຼັງສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນສິ້ນສຸດລົງ. ພາຍຫຼັງສົງຄາມບັ້ນນັ້ນໄດ້ສິ້ນສຸດລົງ 70 ປີຜ່ານມານີ້, ສອງປະເທດໄດ້ປ່ຽນຈາກການເປັນປໍລະປັກກັນກັບມາເປັນການຮ່ວມມືແລະມີໄມຕີຈິດມິດຕະພາບຕໍ່ກັນ, ແລະສອງຝ່າຍລ້ວນແຕ່ໄດ້ຮັບຜົນປະໂຫຍດທີ່ສຳຄັນຈາກສາຍພົວພັນລະຫວ່າງສອງປະເທດທີ່ມີການພັດທະນາຢ່າງໃຫຍ່ຫຼວງ. ພວກຂ້າພະເຈົ້າຄອງຄອຍຢ່າງຈິງໃຈວ່າສາຍພົວພັນລະຫວ່າງຈີນແລະຍີ່ປຸ່ນຈະບັນລຸການພັດທະນາຢ່າງໝັ້ນທ່ຽງ ແລະ ປອດໃສເປັນເວລາຍາວນານພາຍໃຕ້ການຊີ້ນຳຂອງຈິດໃຈການ "ຖືປະຫວັດສາດເປັນແວ່ນແຍງ, ຫັນໜ້າສູ່ອະນາຄົດ".
