ວັນທີ 1 ກັນຍານີ້, ງານວາງສະແດງຈີນ-ອາຊີຕາເວັນອອກສຽງເໜືອຄັ້ງທີ 10 ທີ່ຈະດໍາເນີນເປັນເວລາ 6 ມື້ ໄດ້ໄຂຂຶ້ນຢູ່ສູນວາງສະແດງສາກົນເມືອງສາງຊູ່ນ ແຂວງຈີລິນຂອງຈີນ. ທ່ານວ່າງຢາງ, ຮອງນາຍົກລັດຖະມົນຕີຈີນໄດ້ເຂົ້າຮ່ວມ ແລະກ່າວຄໍາປາໄສໃນພິທີໄຂງານວາງສະແດງດັ່ງກ່າວ.
ງານວາງສະແດງຈີນ-ອາຊີຕາເວັນອອກສຽງເໜືອເປັນງານວາງສະແດງສັງລວມສາກົນລະດັບຊາດທີ່ຜ່ານການອະນຸມັດຈາກຄະນະລັດຖະບານຈີນ ເຊິ່ງກະຊວງການຄ້າຈີນ, ອົງການປົກຄອງແຂວງຈີລິນຈີນ ຮ່ວມກັນເປັນເຈົ້າພາບຈັດງານວາງສະແດງດັ່ງກ່າວ. ງານວາງສະແດງໃນຄັ້ງນີ້ລວມມີຫ້ອງວາງສະແດງທີ່ໄດ້ມາດຕະຖານສາກົນຈໍານວນ 3270 ຫ້ອງ ເຊິ່ງໄດ້ເພີ່ມຂຶ້ນ 712 ຫ້ອງເມື່ອທຽບກັບຄັ້ງທີ່ຜ່ານມາ. ໃນໄລຍະຈັດງານວາງສະແດງດັ່ງກ່າວ ຈະຈັດຫຼາຍກິດຈະກໍາ ເຊິ່ງລວມທັງກອງປະຊຸມໜ່ວຍງານການຮ່ວມມືດ້ານເສດຖະກິດການຄ້າຊາຍແດນ ແລະທ້ອງຖິ່ນລະຫວ່າງຈີນກັບຣັດເຊຍ, ເວທີປຶກສາຫາລືຄົນກາງທີ່ດີເດັ່ນຂອງຈີນ, ຍີ່ປຸ່ນ ແລະສ.ເກົາຫຼີ, ເວທີປຶກສາຫາລືການຮ່ວມມືລະຫວ່າງອົງການປົກຄອງທ້ອງຖິ່ນຂອງຈີນ, ຍີ່ປຸ່ນ ແລະສ.ເກົາຫຼີ.