ພະແນກການຮ່ວມມືດ້ານການຄ້າຂອງສະຖານທູດຝຣັ່ງປະຈໍາຈີນເຜີຍໃຫ້ຮູ້ວ່າ, ຄະນະຜູ້ແທນຄົ້ນຄວ້າ ແລະຜະລິດລົດຍົນຂອງຝຣັ່ງຈະເດີນທາງມາຢ້ຽມຢາມຊຽງໄຮ ແລະຮົງກົງຂອງຈີນເລີ່ມແຕ່ວັນທີ 21 ຫາວັນທີ 25 ກັນຍານີ້. ການຢ້ຽມຢາມຈີນຂອງຄະນະຜູ້ແທນດັ່ງກ່າວແມ່ນມີຈຸດປະສົງເພື່ອແນະນໍາເຕັກໂນໂລຊີ ແລະການປະດິດສ້າງໃໝ່ຂອງຝຣັ່ງໃນຂົງເຂດລົດຍົນທາງອິນເຕີເນັດ ແລະການຂັບແບບອັດຕະໂນມັດນັ້ນ ຕໍ່ວົງການອຸດສາຫະກໍາຂອງຮົງກົງ ກໍ່ຄືແຜ່ນດິນໃຫຍ່ຈີນ.
4 ກຸ່ມອຸດສາຫະກໍາທີ່ຈະເດີນທາງມາຈີນໃນຄັ້ງນີ້ແມ່ນມາໃນນາມຂອງລັດຖະບານ, ເປັນກຸ່ມອຸດສາຫະກໍາທີ່ສະໜັບສະໜູນ ແລະພັດທະນາໂດຍອົງການປົກຄອງທ້ອງຖິ່ນຕ່າງໆຂອງຝຣັ່ງ ເພື່ອຟື້ນຟູອຸດສາຫະກໍາແບບມີການປະດິດສ້າງໃໝ່ໃນຂົງເຂດລົດຍົນຂອງທ້ອງຖິ່ນດັ່ງກ່າວ. ກຸ່ມອຸດສາຫະກໍາຂອງຝຣັ່ງແມ່ນສ້າງຕັ້ງຂຶ້ນໂດຍລັດຖະບານຝຣັ່ງພາຍໃຕ້ຂອບນະໂຍບາຍອຸດສາຫະກໍາອັນໃໝ່ເມື່ອປີ 2005 ເຊິ່ງມີຈຸດປະສົງເພື່ອລະດົມປັດໄຈສໍາຄັນ ຂອງຄວາມສາມາດແກ້ງແຍ້ງ, ກະຕຸກຊຸກຍູ້ການເຕີບໂຕຂອງຂະແໜງການເສົາຄໍ້າ ແລະເພີ່ມທະວີໂອກາດປະກອບອາຊີບ ໂດຍຜ່ານການຍົກສູງຄວາມສາມາດດ້ານການປະດິດສ້າງໃໝ່.
