ຕາມຂ່າວ CRI: ວັນທີ 31 ສິງຫາແລ້ວນີ້, ຜູ້ປະທ້ວງທີ່ຄັດຄ້ານການດັດແກ້ລັດຖະທຳມະນູນແລະເຈົ້າໜ໊າທີ່ທະຫານ-ຕຳຫຼວດອູແກລນໄດ້ເກີດເຫດການປະທະກັນຢ່າງຮຸນແຮງຢູ່ຕໍ່ໜ້າຫໍລັດຖະສະພາທີ່ນະຄອນຫຼວງກຽບຂອງອູແກລນ, ເຮັດໃຫ້ມີທະຫານ 1 ຄົນເສຍຊີວິດ, ເຈົ້າໜ້າທີ່ທະຫານ-ຕຳຫຼວດເກືອບຮ້ອຍຄົນໄດ້ຮັບບາດເຈັບ.
ມື້ດຽວກັນ, ທ່ານດິມິຕຣິ ເປສໂກຟ, ເລຂາທິການຖະແຫຼງຂ່າວຂອງປະທານາທິບໍດີຣັດເຊຍໄດ້ອອກຖະແຫຼງການຕໍ່ສື່ມວນຊົນວ່າ: ຣັດເຊຍມີຄວາມເປັນຫ່ວງເປັນໃຍຕໍ່ເຫດການປະທະກັນຮຸນແຮງຄັ້ງນີ້, ທັງກ່າວປະນາມຕໍ່ເຫດການນີ້, ແຕ່ຣັດເຊຍເຫັນວ່ານີ້ແມ່ນວຽກງານພາຍໃນຂອງອູແກລນ.
ລັດຖະທຳມະນູນສະບັບດັດແກ້ຂອງອູແກລນມີເນື້ອໃນຕົ້ນຕໍຄື: ລັດຖະບານກາງປ່ອຍອຳນາດແລະເປີດກວ້າງສິດປົກຄອງຕົນເອງໃຫ້ທ້ອງຖິ່ນ, ແຕ່ບໍ່ໄດ້ມອບຖານະທາງການເມືອງພິເສດໃຫ້ແກ່ລັດໂດເນັສກ໌ແລະລັດໂລຮານສກ໌ທີ່ຢູ່ທາງພາກຕາເວັນອອກຂອງອູແກລນ, ແຕ່ໄດ້ສະເໜີວ່າຈະວາງຂໍ້ກຳນົດຕໍ່ການປົກຄອງຕົນເອງດ້ວຍຮູບການພິເສດຢູ່ບາງທ້ອງຖິ່ນທີ່ທາງພາກຕາເວັນອອກຂອງອູແກລນໃນກົດໝາຍອີກສະບັບໜຶ່ງ. ບາງພັກຝ່າຍແລະອົງການຈັດຕັ້ງສັງຄົມໄດ້ຄັດຄ້ານຕໍ່ເລື່ອງນີ້ຢ່າງເດັດຂາດ.