ຕາມຂ່າວCRI: ວັນທີ 8 ຕຸລານີ້, ທ່ານຢາງແຈສື, ທີ່ປຶກສາແຫ່ງລັດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານອານໂທນີ ບຼີນເຄນ, ລັດຖະມົນຕີຊ່ວຍວ່າການປະຈຳການຂອງກະຊວງການຕ່າງປະເທດອາເມລິກາ.
ທ່ານຢາງແຈສືກ່າວວ່າ, ຫວ່າງບໍ່ດົນມານີ້, ທ່ານສີຈິ້ນຜີງ, ປະທານປະເທດຈີນໄດ້ເດີນທາງໄປຢ້ຽມຢາມອາເມລິກາທາງລັດຖະກິດຢ່າງໄດ້ຮັບຜົນສຳເລັດ. ປະມຸກລັດສອງປະເທດໄດ້ຢືນຢັນຕໍ່ທິດທາງທີ່ຖືກຕ້ອງຂອງການພັດທະນາການພົວພັນລະຫວ່າງຈີນກັບອາເມລິກາຕື່ມອີກ, ແລະໄດ້ຊຸກຍູ້ການຮ່ວມມືທີ່ສຳຄັນໃນລະດັບສອງຝ່າຍ, ພາກພື້ນແລະທົ່ວໂລກລະຫວ່າງຈີນກັບອາເມລິກາຢ່າງແຂງແຮງ. ໃນໄລຍະຕໍ່ໜ້ານີ້, ສອງຝ່າຍຕ້ອງພະຍາຍາມຮ່ວມກັນ, ຕັ້ງໜ້າປະຕິບັດຂໍ້ຕົກລົງທີ່ສຳຄັນຂອງປະມຸກລັດສອງປະເທດ, ຊຸກຍູ້ການພົວພັນລະຫວ່າງຈີນກັບອາເມລິກາໃຫ້ໄດ້ຮັບການພັດທະນາຢ່າງດີງາມແລະໝັ້ນທ່ຽງຢ່າງຕໍ່ເນື່ອງ.
ທ່ານອານໂທນີ ບຼີນເຄນກ່າວວ່າ, ການເດີນທາງໄປຢ້ຽມຢາມອາເມລິກາຢ່າງມີຜົນສຳເລັດຂອງທ່ານສີຈິ້ນຜີງໄດ້ສະແດງໃຫ້ທົ່ວໂລກຮູ້ວ່າ, ອາເມລິກາກັບຈີນສາມາດດຳເນີນການຮ່ວມມືທີ່ມີຄວາມໝາຍໃນບັນຫາສຳຄັນຕ່າງໆ. ອາເມລິກາຍິນດີຮ່ວມກັນກັບຈີນ, ຕັ້ງໜ້າປະຕິບັດຂໍ້ຕົກລົງແລະຜົນສຳເລັດຂອງການຢ້ຽມຢາມຄັ້ງນີ້, ເຮັດໃຫ້ການພົວພັນລະຫວ່າງອາເມລິກາກັບຈີນໄດ້ຮັບການພັດທະນາໄປໜ້າຢ່າງຕໍ່ເນື່ອງ.
