ທ່ານລິວຢຸນສ່ານໄດ້ຝາກຄຳຢື້ຢາມຖາມຂ່າວອັນສະໜິດສະໜົມແລະພອນໄຊອັນປະເສີດຂອງທ່ານສີຈິ້ນຜີງ, ເລຂາທິການໃຫຍ່ພັກຄອມມູນິດຈີນໄປຍັງທ່ານກິມຈົງອຸນ, ທັງໄດ້ມອບຈົດໝາຍຂອງທ່ານສີຈິ້ນຜີງໃຫ້. ໃນຈົດໝາຍດັ່ງກ່າວ, ທ່ານສີຈິ້ນຜີງກ່າວວ່າ, ມິດຕະພາບອັນເປັນມູນເຊື້ອລະຫວ່າງຈີນກັບສປປເກົາຫຼີແມ່ນຜູ້ນຳລຸ້ນເກົ່າຂອງສອງຝ່າຍຮ່ວມກັນສ້າງຂຶ້ນແລະບຳລຸງເສີມສ້າງຢ່າງຕັ້ງໃຈ, ເປັນຄຸນສົມບັດອັນລ້ຳຄ່າຮ່ວມກັນຂອງສອງຝ່າຍ, ເຊິ່ງເປັນສິ່ງທີ່ພວກຂ້າພະເຈົ້າຄວນທະນຸຖະໜອມໃຫ້ດີ. ພັກແລະລັດຖະບານຈີນໃຫ້ຄວາມສຳຄັນໃນລະດັບສູງຕໍ່ສາຍພົວພັນລະຫວ່າງຈີນກັບສປປເກົາຫຼີ,ຍຶດໝັ້ນທ່າທີປະຕິບັດຕໍ່ການຂະຫຍາຍສາຍພົວພັນຈີນກັບສປປເກົາຫຼີຈາກລະດັບສູງແຫ່ງຍຸດທະສາດແລະໄລຍະຍາວໄກ, ຍຶດໝັ້ນປົກປັກຮັກສາ, ປັບປຸງແລະຂະຫຍາຍສາຍພົວພັນສອງປະເທດໃຫ້ດີ. ພາຍໃຕ້ສະພາບການໃໝ່, ພວກຂ້າພະເຈົ້າຍິນດີເລີ່ມຈາກພາກສ່ວນໃຫຍ່ແຫ່ງສາຍພົວພັນຈີນ-ສປປເກົາຫຼີແລະແຜນການພັດທະນາຂອງສອງປະເທດ, ຮ່ວມກັບຝ່າຍສປປເກົາຫຼີແລກປ່ຽນຢ່າງໃກ້ຊິດແລະລົງເລິກການຮ່ວມມື, ຊຸກຍູ້ໃຫ້ສາຍພົວພັນຈີນ-ສປປເກົາຫຼີຂະຫຍາຍຕົວຢ່າງຍາວນານ, ປອດໃສແລະໝັ້ນທ່ຽງ.
ທ່ານກິມຈົງອຸນກ່າວວ່າ,ເນື່ອງໃນໂອກາດວັນສ້າງຕັ້ງພັກແຮງງານເກົາຫຼີ ຄົບຮອບ70ປີ,ສູນກາງພັກຄອມມູນິດຈີນທີ່ມີສະຫາຍສີຈິ້ນຜີງເປັນເລຂາທິການໃຫຍ່ນັ້ນໄດ້ແຕ່ງຕັ້ງຄະນະຜູ້ແທນພັກຄອມມູນິດຈີນທີ່ນຳພາໂດຍສະຫາຍລິວຢຸນສ່ານ, ເຊິ່ງໄດ້ສະແດງໃຫ້ເຫັນເຖິງມິດຕະພາບອັນເລິກເຊິ່ງລະຫວ່າງສປປເກົາຫຼີກັບຈີນ, ນີ້ໄດ້ໃຫ້ກຳລັງໃຈຢ່າງຫຼວງຫຼາຍໃຫ້ແກ່ພັກແລະປະຊາຊົນຂອງສປປເກົາຫຼີ. ຝ່າຍສປປເກົາຫຼີຍິນດີຮ່ວມກັບຈີນ, ສືບຕໍ່ຮັກສາການໄປມາຫາສູ່ກັນລະຫວ່າງຜູ້ນຳຂັ້ນນສູງ, ເພີ່ມທະວີການແລກປ່ຽນແລະການຮ່ວມມືອັນແທ້ຈິງໃນຂົງເຂດຕ່າງໆ. ເຊື່ອໝັ້ນວ່າຜ່ານຄວາມພະຍາຍາມຮ່ວມກັນຂອງພວກຂ້າພະເຈົ້າ, ຈະສ້າງອະນາຄົດອັນດີງາມໃຫ້ແກ່ສາຍພົວພັນສປປເກົາຫຼີ-ຈີນ.
