ຕາມຂ່າວCRI: ຕາມໂທລະພາບຂ່າວຂອງອີຣານລາຍງານວ່າ: ວັນທີ 11 ຕຸລານີ້, ລັດຖະສະພາອີຣານໄດ້ຮັບຮອງແຜນການເຄື່ອນໄຫວຮອບດ້ານປະສົມຫຼື JCPOA ທີ່ອະນຸມັດໃຫ້ລັດຖະບານອີຣານບົນພື້ນຖານຢ່າງມີເງື່ອນໄຂໃນການປະຕິບັດສັນຍາສະບັບສຸດທ້າຍກ່ຽວກັບບັນຫານິວເຄລຍຂອງອີຣານຢ່າງສະໝັກໃຈທີ່ອີຣານກັບ 6 ປະເທດກ່ຽວກັບບັນຫານິວເຄລຍຂອງອີຣານຄື: ອາເມລິກາ, ຈີນ, ຣັດເຊຍ, ອັງກິດ, ຝະຣັ່ງແລະເຢຍລະມັນຫຼື 5+1 ທີ່ໄດ້ເຊັນກັນໃນວັນທີ 14 ກໍລະກົດປີນີ້.
ຍັດຕິກົດໝາຍດັ່ງກ່າວກ່າວເນັ້ນໃນເວລາດຽວກັນວ່າ: ການເຄື່ອນໄຫວສຳຫຼວດກວດກາໃດໆຂອງອົງການພະລັງງານປະລະມານູສາກົນຕໍ່ອີຣານ, ລ້ວນແຕ່ຕ້ອງສອດຄ່ອງກັບຂໍ້ກຳນົດທີ່ກ່ຽວຂ້ອງຂອງກົດໝາຍສາກົນພ້ອມທັງຮັບປະກັນຄວາມໝັ້ນຄົງຂອງຊາດອີຣານ. ຍັດຕິກົດໝາຍດັ່ງກ່າວໄດ້ຮຽກຮ້ອງໃຫ້ລັດຖະບານອີຣານໃຊ້ການກະທຳທຸກຢ່າງເພື່ອປ້ອງກັນຄວາມລັບດ້ານການທະຫານແລະຄວາມໝັ້ນຄົງຂອງອີຣານ, ພ້ອມທັງຫ້າມບໍ່ໃຫ້ອົງການພະລັງງານປະລະມານູສາກົນດຳເນີນການສຳຫຼວດກວດກາຕໍ່ພື້ນຖານໂຄງລ່າງການທະຫານຂອງອີຣານໃນນາມການປະຕິບັດ JCPOA.