ວັນທີ 12 ຕຸລານີ້ເປັນມື້ທໍາອິດທີ່ຄະນະກໍາມະການການເລືອກຕັ້ງທົ່ວໄປຟິລິບປິນປີ 2016 ເປີດການລົງທະບຽນເຂົ້າຮ່ວມການເລືອກຕັ້ງ. ໃນມື້ດັ່ງກ່າວລວມມີ 22 ຄົນລົງທະບຽນເຂົ້າຮ່ວມການເລືອກຕັ້ງປະທານາທິບໍດີ.
ໃນເວລາ 17 ໂມງຂອງວັນທີ 12 ຕຸລານີ້ ເຊິ່ງເປັນມື້ທໍາອິດຂອງການລົງທະບຽນ, ໄດ້ມີ 41 ຄົນເດີນທາງໄປຫ້ອງການວຽກງານການເລືອກຕັ້ງທີ່ນະຄອນຫຼວງມານີລາເພື່ອລົງທະບຽນ ແລະເຂົ້າຮ່ວມການເລືອກຕັ້ງປະທານາທິບໍດີ, ຮອງປະທານາທິບໍດີ ແລະສະມາຊິກສະພາສູງ. ໃນນັ້ນ, ມີ 22 ຄົນລົງທະບຽນເຂົ້າຮ່ວມການເລືອກຕັ້ງປະທານາທິບໍດີ, 3 ຄົນລົງທະບຽນເຂົ້າຮ່ວມການເລືອກຕັ້ງຮອງປະທານາທິບໍດີ ແລະ 16 ຄົນເຂົ້າຮ່ວມການເລືອກຕັ້ງສະມາຊິກສະພາສູງ.
ໃນວັນທີ 9 ພຶດສະພາປີ 2016, ຟິລິບປິນຈະຈັດການເລືອກຕັ້ງທົ່ວໄປ ເພື່ອເລືອກຕັ້ງລັດຖະກອນ 18.000 ກວ່າຄົນ ເຊິ່ງລວມທັງປະທານາທິບໍດີ, ຮອງປະທານາທິບໍດີ, ສະມາຊິກສະພາສູງ, ສະມາຊິກສະພາຕໍ່າ ແລະເຈົ້າໜ້າທີ່ອໍານາດການປົກຄອງທ້ອງຖິ່ນ. ໃນໄລຍະ 5 ມື້ ເລີ່ມແຕ່ວັນທີ 12 ຫາວັນທີ 16 ຕຸລານີ້, ຜູ້ສະໝັກຮັບເລືອກຕັ້ງສາມາດຍື່ນຟອມລົງທະບຽນຢູ່ທີ່ອົງການເລືອກຕັ້ງ, ນີ້ກໍ່ໝາຍຄວາມວ່າໄດ້ເປີດສາກການແຂ່ງຂັນເລືອກຕັ້ງທົ່ວໄປຢ່າງເປັນທາງການ.