ວັນທີ 8 ກຸມພານີ້, ແມ່ນມື້ຂຶ້ນໜຶ່ງຄ່ຳເດືອນຈຽງຈັນທະຄະຕິຈີນ, ສະມາຄົມຈີນນະຄອນຫຼວງວຽງຈັນຂອງລາວ ແລະຜູ້ຕາງໜ້າຊາວຈີນແລະຈີນຕ່າງດ້າວຢູ່ລາວໄດ້ໄປອວຍພອນປີໃໝ່ຢູ່ສະຖານທູດຈີນປະຈຳລາວ, ສະເຫຼີມສະຫຼອງປີວອກທີ່ວຽນມາເຖິງ.
ຕອນເຊົ້າມື້ຂຶ້ນໜຶ່ງຄ່ຳ,ສະມາຄົມຈີນນະຄອນຫຼວງວຽງຈັນຂອງລາວ ຄະນະຊາວຈີນປະຈຳລາວພ້ອມທັງຊາວຈີນແລະຈີນຕ່າງດ້າວຢູ່ນະຄອນຫຼວງວຽງຈັນລວມ 100 ກວ່າຄົນນຸ່ງຊຸດຍາມບຸນທີ່ສຸພາບຮຽບຮ້ອຍ ເຕົ້າໂຮມກັນຢູ່ສະຖານທູດຈີນປະຈຳລາວ,ຮ່ວມກັບທ່ານກວນຮວາປີ່ງ ເອກອັກຄະລັດຖະທູດຈີນວິສາມັນຜູ້ມີອຳນາດເຕັມປະຈຳລາວພ້ອມດ້ວຍພະນັກງານສະຖານທູດຈີນປະຈຳລາວສະເຫຼີມສະຫຼອງບຸນກຸດຈີນປີວອກນຳກັນແລະສົ່ງຄຳອວຍພອນປີໃໝ່ແກ່ກັນ. ຄະນະເຊີດສິງໂຕເຍົາວະຊົນຂອງສະມາຄົມຈີນໄດ້ສະແດງການເຊີດສິງໂຕແລະກັງຟູຈີນທີ່ໜ້າຊົມຢູ່ເດີ່ນສະຖານທູດຈີນປະຈຳລາວ ເຊິ່ງໄດ້ເພີ່ມບັນຍາກາດມ່ວນຊື່ນໃຫ້ແກ່ສະຖານທູດຈີນປະຈຳລາວ.
ທ່ານກວນຮວາປີ່ງ ເອກອັກຄະລັດຖະທູດຈີນປະຈຳລາວໄດ້ຕາງໜ້າພະນັກງານສະຖານທູດຈີນປະຈຳລາວທັງໝົດອວຍພອນປີໃໝ່ຕໍ່ຊາວຈີນແລະຈີນຕ່າງດ້າວຢູ່ລາວ. ທ່ານກ່າວວ່າ: ບຸນກຸດຈີນແມ່ນມື້ສົ່ງປີເກົ່າຕ້ອນຮັບປີໃໝ່, ໃນໜຶ່ງປີທີ່ຜ່ານມາ, ພາຍໃຕ້ຄວາມເອົາໃຈໃສ່ແລະການຊີ້ນຳຢ່າງອົບອຸ່ນຂອງຜູ້ນຳສອງປະເທດ ແລະຄວາມພະຍາຍາມຮ່ວມຂອງສອງຝ່າຍຈີນ-ລາວ ລາວ-ຈີນ, ການພົວພັນລະຫວ່າງສອງຝ່າຍໄດ້ມີການຂະຫຍາຍຕົວຢ່າງສະດວກແລະໄດ້ຮັບຜົນສຳເລັດຢ່າງອຸດົມສົມບູນ. ປີ 2016 ແມ່ນປີທີ່ຈີນລາວສ້າງສາຍພົວພັນທາງການທູດຄົບຮອບ 55 ປີ, ເນື່ອງໃນໂອກາດນີ້, ພວກເຮົາຍິນດີຈັດຕັ້ງປະຕິບັດຄວາມເປັນເອກະພາບກັນອັນສຳຄັນຂອງຜູ້ນຳສອງປະເທດ, ຮ່ວມກັນຊຸກຍູ້ການພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດໃຫ້ກ້າວໄປໜ້າຢ່າງບໍ່ຢຸດຢັ້ງ. ຂໍອວຍພອນໃຫ້ສາທາລະນະລັດປະຊາທິປະໄຕປະຊາຊົນລາວວັດທະນາຖາວອນ, ມິດຕະພາບຈີນ-ລາວ ລາວ-ຈີນຈົ່ງໝັ້ນຄົງຂະໜົງແກ່ນຕະຫຼອດໄປ!
