ວັນທີ 8 ກຸມພານີ້, ແມ່ນມື້ຂຶ້ນປີໃໝ່ຕາມຈັນຕະຄະຕິຂອງຈີນ. ແຫ່ງຕ່າງໆຂອງຈີນສະຫຼອງບຸນກຸດຈີນ ເຊິ່ງເປັນວັນບຸນສຳຄັນທີ່ສຸດໃນປີໜຶ່ງດ້ວຍຫຼາຍຮູບຫຼາຍແບບ.
ຢູ່ນະຄອນຫຼວງປັກກິ່ງ, ບຸນວັດໃນຍາມບຸນກຸດຈີນແມ່ນຮູບການສະຫຼອງປີໃໝ່ອັນມີມູນເຊື້ອ, ເຄື່ອງສິລະປະພື້ນເມືອງ, ຂະໜົມຊະນິດຕ່າງໆ ແລະ ການສະແດງສິລະປະວັດທະນະທຳໄດ້ເຕົ້າໂຮມກັນຢູ່ບຸນວັດ, ສ້າງງານມະຫາກຳດ້ານຮີດຄອງປະເພນີ, ການສະແດງ ແລະ ອາຫານແຊບໃຫ້ແກ່ປະຊາຊົນທັງຫຼາຍ.
ຊາວກວາງໂຈ່ວຫຼິ້ນບຸນກຸດຈີນມັກເລາະທ່ຽວງານດອກໄມ້ສົດເພື່ອຕ້ອນຮັບລະດູໃບໄມ້ປົ່ງ, ໃນຍາມບຸນກຸດຈີນປີນີ້, ແຕ່ລະມື້ກໍ່ມີດອກໄມ້ສົດຫຼາຍກວ່າ 20 ໂຕນຖືກສົ່ງໄປຮອດນະຄອນກວາງໂຈ່ວໂດຍເຮືອບິນ, ພ້ອມກັນນັ້ນຍັງມີການສະແດງຮີດຄອງປະເພນີ, ມໍລະດົກວັດທະນະທຳທີ່ບໍ່ແມ່ນວັດຖຸ ແລະ ສິລະປະໂຄມໄຟເປັນຕົ້ນ, ໃຫ້ປະຊາຊົນເຂົ້າໃຈສີສັນພິເສດຖ້ອງຖິ່ນຢ່າງດີກວ່າເກົ່າ.
ນອກຈາກນັ້ນ, ຢູ່ຮົງກົງ, ຖະໜົນສາຍຕ່າງໆຖືກປະດັບຢ່າງສວຍງາມໃນຍາມວັນບຸນ, ການສະແດງເຊີດສິງໂຕໄດ້ດຶງດູດນັກທ່ອງທ່ຽວ ແລະ ພົນລະເມືອງຮົງກົງມາຊົມເບິ່ງ. ຢູ່ມາເກົາ, ນອກຈາກລົດດອກໄມ້ອັນມີມູນເຊື້ອ, ໃນມື້ສັງຂານລ່ວງຍັງມີການສະແດງແສງສີຢ່າງສວຍງາມ, ໂຄມໄຟຮູບດອກກຸຫຼາບ 9 ພັນ 999 ໜ່ວຍທີ່ຢູ່ 10 ກວ່າແຫ່ງໄດ້ສ້າງບັນຍາກາດໂລມັງຕິກປີໃໝ່.
ຮີດຄອງປະເພນີອັນມີມູນເຊື້ອເປັນການສືບທອດປະຫວັດສາດ, ການປ່ຽນແປງຂອງຮີດຕ່າງໆກໍ່ໄດ້ສະແດງໃຫ້ເຫັນການປ່ຽນແປງຂອງຍຸກສະໄໝ, ທີ່ບໍ່ປ່ຽນແປງພຽງອັນດຽວນັ້ນແມ່ນ "ຄວາມອວຍພອນບຸນກຸດຈີນ" ທີ່ຢາກໃຫ້ຄອບຄົວເຕົ້າໂຮມກັນ, ມີຄວາມສິລິມົງຄຸນ ແລະ ມີຄວາມໝັ້ນທ່ຽງຝັງເລິກໃນຫົວໃຈຂອງຊາວຈີນໝົດທຸກຄົນ.