ຕາມຂ່າວຈາກເວັບໄຊຂ່າວສານຫວຽດນາມລາຍງານວ່າ, ຫວ່າງກ່ອນນີ້ບໍ່ດົນຢູ່ນະຄອນໂຮຈີມິນ,ທ່ານຫງວຽນຊວນຟຸກ, ນາຍົກລັດຖະມົນຕີຜູ້ໃໝ່ຂອງຫວຽດນາມໄດ້ຈັດງານສົນທະນາລະຫວ່າງລັດຖະບານກັບວິສາຫະກິດເປັນຄັ້ງທຳອິດຫຼັງຈາກທ່ານດຳລົງຕຳແໜ່ງນາຍົກລັດຖະມົນຕີ, ເພື່ອແກ້ໄຂບັນຫາຫຍຸ້ງຍາກໃນການພັດທະນາຂອງວິສາຫະກິດໂດຍສະເພາະແມ່ນວິສາຫະກິດເອກະຊົນ. ງານສົນທະນາມີຫົວຂໍ້ວ່າ "ວິສາຫະກິດຫວຽດນາມແມ່ນພະລັງແຮງຊຸກຍູ້ການພັດທະນາຂອງເສດຖະກິດແຫ່ງຊາດ", ແລະຈະວາງນະໂຍບາຍແລະມາດຕະການລະອຽດໃນ10ດ້ານສຳຄັນ, ເພື່ອສົ່ງເສີມການລົງທຶນແລະທຸລະກິດຂອງວິສາຫະກິດ, ອອກແຮງສະໜັບສະໜູນການພັດທະນາຂອງວິສາຫະກິດ.
10ດ້ານດັ່ງກ່າວລວມທັງ:ລັດປົກປ້ອງສິດຜົນປະໂຫຍດທີ່ຊອບທຳຂອງວິສາຫະກິດຕາມກົດໝາຍ, ຮັບປະກັນສິດດຳເນີນທຸລະກິດຂອງວິສາຫະກິດ; ນອກຈາກພົບກໍລະນີພິເສດ, ວິສາຫະກິດໃນຂະໜາດຕ່າງກັນ, ປະເພດຕ່າງກັນແລະກຳມະສິດຕ່າງກັນ, ມີຄວາມສະເໝີພາບກັນໃນດ້ານການຮັບເງິນທຶນ, ການນຳໃຊ້ທີ່ດິນແລະຂໍ້ກຳນົດດ້ານທຸລະກິດ; ສ້າງເງື່ອນໄຂເພື່ອໃຫ້ວິສາຫະກິດດຳເນີນການລົງທຶນຢ່າງໄວ້ວາງໃຈ, ລັດຖະບານຮັບປະກັນຄວາມໝັ້ນທ່ຽງຍາວນານຂອງນະໂຍບາຍ, ເດັດຂາດຈະບໍ່ປ່ຽນແປງນະໂຍບາຍພາຍໃນເວລາສັ້ນໆ; ພະຍາຍາມຮັກສາຄວາມໝັ້ນທ່ຽງຂອງເສດຖະກິດມະຫາພາກ; ວາງຂໍ້ກຳນົດດ້ານເງື່ອນໄຂດຳເນີນທຸລະກິດຢ່າງເປັນຮູບການຈຳນວນ,ໂປ່ງໃສແລະເຂົ້າໃຈງ່າຍ, ເພື່ອໃຫ້ປະຊາຊົນແລະວິສາຫະກິດເຂົ້າໃຈໄດ້; ຖືວິສາຫະກິດເອກະຊົນເປັນພະລັງແຮງຊຸກຍູ້ການພັດທະນາຂອງເສດຖະກິດ,ສົ່ງເສີມການພັດທະນາຂອງວິສາຫະກິດຂະໜາດກາງແລະນ້ອຍ;ຫຼຸດແລະຍົກເລີກອາກອນທີ່ບໍ່ສົມເຫດສົມຜົນ, ຫຼຸດອັດຕາດອກເບ້ຍເງິນກູ້ 1%ໃຫ້ແກ່ວິສາຫະກິດໃນຂົງເຂດໄລຍະກາງແລະຍາວ, ແລະຂົງເຂດບູລິມະສິດ, ດັ່ງນີ້ເປັນຕົ້ນ.
 |
