ວັນທີ6ພຶດສະພານີ້, ອົງການສະຫະປະຊາຊາດໄດ້ປະກາດສ້າງຕັ້ງກອງທຶນຫຼາຍຝ່າຍເພື່ອຮັບມືກັບການລະບາດເຊື້ອພະຍາດຊີກາ, ເຊິ່ງຈະໃຫ້ການສະໜັບສະໜູນດ້ານທຶນຮອນໃຫ້ແກ່ລະບົບອົງການສະຫະປະຊາຊາດພ້ອມຄູ່ຮ່ວມມື.
ມື້ດຽວກັນ, ໃນງານຖະແຫຼງຂ່າວ, ທ່ານສະເຕຟານ ດູຈາຣິກ, ໂຄສົກເລຂາທິການໃຫຍ່ສະປະຊາຊາດໃຫ້ຮູ້ວ່າ, ທ່ານບັນກີມຸນ, ເລຂາທິການໃຫຍ່ສະຫະປະຊາຊາດໄດ້ສ້າງຕັ້ງກອງທຶນດັ່ງກ່າວ, ເຊິ່ງເປັນເວທີທີ່ວ່ອງໄວ, ຄ່ອງແຄ້ວແລະ ຮັບຜິດຊອບເພື່ອສະໜັບສະໜູນລະບົບສະຫະປະຊາຊາດພ້ອມຄູ່ຮ່ວມມືໃນການຮັບມືກັບການລະບາດຂອງເຊື້ອພະຍາດຊີກາ. ຂະນະດຽວກັນ,ກອງທຶນດັ່ງກ່າວຈະໃຫ້ການສະໜັບສະໜູນໂດຍກົງແກ່ຂອບຍຸດທະສາດຮັບມືກັບເຊື້ອພະຍາດຊີກາທີ່ສະເໜີໂດຍອົງການອະນາໄມໂລກ.
ອີງຕາມຕົວເລກສະຖິຕິຂອງສະຫະປະຊາຊາດ, ນັບແຕ່ເດືອນມັງກອນປີກາຍນີ້ເປັນຕົ້ນມາ, 61ປະເທດແລະເຂດແຄວ້ນໃນໂລກໄດ້ລາຍງານກໍລະນີການລະບາດຂອງເຊື້ອພະຍາດຊີກາ.
ປີ1947, ໄດ້ຄົ້ນພົບເຊື້ອພະຍາດຊີກາຢູ່ອາຟຼິກາເປັນຄັ້ງທຳອິດ, ຕົ້ນຕໍແມ່ນລະບາດຜ່ານຍຸງເອຢິບທີ່ຕິດເຊື້ອພະຍາດຊີກາ.ຜູ້ຕິດເຊື້ອພະຍາດຊີກາສ່ວນຫຼາຍ ມີອາການຄ້າຍຄືພະຍາດໄຂ້ເລືອດອອກແຕ່ບໍ່ຮຸນແຮງ, ປັດຈຸບັນຍັງບໍ່ທັນມີວິທີປິ່ນປົວແລະວັກແຊັງທີ່ມີປະສິດທິຜົນເທື່ອ.