ວາລະສານ 《ຂໍ້ມູນຍຸດທະສາດທົ່ວໂລກ》 ຫຼື 《Executive Intelligence Review》 ອາເມລິກາສະບັບຫຼ້າສຸດທີ່ພິມຈຳໜ່າຍໃນວັນທີ 6 ພຶດສະພານີ້ ໄດ້ລົງພິມບົດຄວາມລົງນາມຂອງທ່ານວິຫຼ້ຽມ ໂຈນສ໌ ຜູ້ວ່າການ ສຳນັກງານວາລະສານດັ່ງກ່າວສາຂາວໍຊິງຕັນ. ບົດຄວາມຊີ້ອອກວ່າ, ນະໂຍບາຍທ້າທາຍເກາະຜິດຂອງລັດຖະບານອາເມລິກາທີ່ອອກແຮງແຊກແຊງບັນຫາທະເລຈີນໃຕ້ນັ້ນ ແມ່ນ "ນະໂຍບາຍຂົ່ມຂູ່ດ້ວຍກຳລັງຮົບ" ໃນຍຸກປັດຈຸບັນ, ຈຳເປັນຕ້ອງປ່ຽນແປງໃນທັນທີ.
ບົດວິເຄາະທີ່ພາດຫົວເລື່ອງວ່າ 《ຕອນຕົ້ນຂອງສົງຄາມພາກພື້ນປາຊິຟິກ》 ຊີ້ອອກວ່າ, ເພື່ອປົກປ້ອງຜົນປະໂຫຍດສ່ວນຕົວຂອງຕົນ, ອາເມລິກາບໍ່ເຂົ້າເປັນປະເທດສະມາຊິກຂອງ 《ສົນທິສັນຍາວ່າດ້ວຍກົດໝາຍທະເລສະຫະປະຊາຊາດ》ຫຼື UNCLOS, ຍັງອອກແຮງປະຕິບັດແລະສົ່ງເສີມນະໂຍບາຍ "ເສລີແຫ່ງການເດີນເຮືອ" ແຕ່ຝ່າຍດຽວ, ໃຫ້ກຳປັ່ນຮົບອາເມລິກາໄປມາຢູ່ຊາຍແດນຕ່າງປະເທດຕາມລຳພັງໃຈ. ທີ່ຈິງແລ້ວ, ນີ້ກໍ່ແມ່ນປະຕິບັດ "ນະໂຍບາຍຂົ່ມຂູ່ດ້ວຍກຳລັງຮົບ". ນະໂຍບາຍນີ້ອາດຈະພາໃຫ້ເກີດການປະທະກັນໂດຍກົງລະຫວ່າງປະເທດໃຫຍ່ທີ່ມີອາວຸດນິວເຄຼຍ, ຈົນວ່າເກີດສົງຄາມ.
ບົດຄວາມຍັງຊີ້ອອກວ່າ, ຈີນໄດ້ສຸມກຳລັງເຂົ້າໃນການຮັກສາການພົວພັນໄມຕີຈິດມິດຕະພາບ, ສັນຕິພາບແລະສະເຖຍລະພາບຂອງເຂດທະເລຈີນໃຕ້ຢ່າງສະເໝີຕົ້ນສະເໝີປາຍ, ແລະພະຍາຍາມແກ້ໄຂຄວາມຂັດແຍ້ງກັນໂດຍຜ່ານການປຶກສາຫາລືລະຫວ່າງສອງຝ່າຍ. ກອງປະຊຸມສຸດຍອດຈີນ—ອາຊຽນປີ 2012 ໄດ້ອອກ 《ຖະແຫຼງການຮ່ວມເພື່ອລະລຶກການລົງນາມໃນ <ຖະແຫຼງການວ່າດ້ວຍການກະທຳຂອງຝ່າຍຕ່າງໆຢູ່ທະເລຈີນໃຕ້> ຄົບຮອບ 10 ປີ》. ຖະແຫຼງການຮ່ວມຮຽກຮ້ອງໃຫ້ປະເທດທີ່ກ່ຽວຂ້ອງໂດຍກົງແກ້ໄຂຄວາມຂັດແຍ່ງໂດຍຜ່ານການປຶກສາຫາລືແລະການເຈລະຈາ, ບໍ່ໃຊ້ກຳລັງອາວຸດຫຼືຂົ່ມຂູ່ດ້ວຍກຳລັງອາວຸດ, ຮັກສາຄວາມອົດກັ້ນໄວ້, ບໍ່ປະຕິບັດການເຄື່ອນໄຫວທີ່ຈະພາໃຫ້ຄວາມຂັດແຍ່ງສັບສົນຂຶ້ນຕື່ມຮ້າຍແຮງຂຶ້ນຕື່ມ ແລະກະທົບເຖິງສັນຕິພາບແລະສະເຖຍລະພາບ ໂດຍອີງຕາມຫຼັກການທີ່ຮັບຮູ້ໂດຍທົ່ວໄປຈາກກົດໝາຍສາກົນຕ່າງໆ ເຊິ່ງລວມທັງ 《ສົນທິສັນຍາວ່າດ້ວຍກົດໝາຍທະເລສະຫະປະຊາຊາດ》. ທັງໝົດເຫຼົ່ານີ້ ຄວນເປັນທິດທາງຫຼັກໃນການແກ້ໄຂຄວາມຂັດແຍ່ງກັນຢູ່ເຂດທະເລຈີນໃຕ້.
ບົດຄວາມຊີ້ອອກວ່າ, ການຕັດສິນບັນຫາທະເລຈີນໃຕ້ທີ່ຟິລິບປິນສະເໜີອອກແຕ່ຝ່າຍດຽວໃນປັດຈຸບັນ ແມ່ນການບັນລະຍາຍຕາມລຳພັງໃຈຕໍ່ທິດທາງດັ່ງກ່າວ, ສ່ວນການສະໜັບສະໜູນຂອງອາເມລິກາທີ່ມີຕໍ່ຟິລິບປິນຍິ່ງເຮັດໃຫ້ການເຄື່ອນໄຫວແຕ່ຝ່າຍດຽວດັ່ງກ່າວຕົກຢູ່ໃນສະພາບທີ່ກັບຄືນຍາກ.
 |
