ຫຼັກໝັ້ນຂອງຈີນກ່ຽວກັບບັນຫາທະເລຈີນໃຕ້ພວມໄດ້ຮັບຄວາມເຂົ້າໃຈແລະສະໜັບສະໜຸນຈາກປະເທດນັບມື້ນັບຫຼາຍ
2016-05-14 15:35:08 cri
ວັນທີ 13 ພຶດສະພານີ້ ທ່ານລູ້ຄ່າງ ໂຄສົກກະຊວງການຕ່າງປະເທດຈີນກ່າວວ່າ, ຫຼັກໝັ້ນຂອງຈີນກ່ຽວກັບບັນຫາທະເລຈີນໃຕ້ພວມໄດ້ຮັບຄວາມເຂົ້າໃຈແລະສະໜັບສະໜຸນຈາກປະເທດນັບມື້ນັບຫຼາຍ, ຈີນຂໍຍ້ອງຍໍຊົມເຊີຍຢ່າງສູງຕໍ່ປະເທດແລະອົງການຈັດຕັ້ງພາກພື້ນໄດ້ສົ່ງສຽງແຫ່ງຍຸດຕິທຳອອກມາ.
ໃນກອງປະຊຸມຂ່າວທີ່ຈັດຂຶ້ນໃນມື້ດຽວກັນ, ທ່ານລູ້ຄ່າງກ່າວວ່າ, ວັນນທີ 12 ພຶດສະພານີ້ ກອງປະຊຸມລະດັບລັດຖະມົນຕີຄັ້ງທີ 7 ຂອງເວທີປຶກສາຫາລືກາຮ່ວມມືຈີນ-ອາຣັບໄດ້ຜ່ານຮັບຮອງ 《ຖະແຫຼງການໂດຮາ》ໂດຍເນັ້ນໜັກວ່າ, ປະເທດອາຣັບສະໜັບສະໜຸນຈີນແລະປະເທດທີ່ກ່ຽວຂ້ອງແກ້ໄຂບັນຫາຂັດແຍ່ງກັນດ້ານດິນແດນແລະທະເລ ດ້ວຍການປຶກສາຫາລືແລະເຈລະຈາກັນຢ່າງມີໄມຕີຈິດມິດຕະພາບ ໂດຍອີງຕາມສັນຍາສອງຝ່າຍແລະຄວາມຮັບຮູ້ທີ່ເປັນເອກະສັນກັນທີ່ກ່ຽວຂ້ອງຂອງພາກພື້ນແຫ່ງນີ້; ແລະກ່າວເນັ້ນວ່າ ຄວນເຄົາລົບສິດທິໃນການເລືອກເອົາວິທີແກ້ໄຂຄວາມຂັດແຍ່ງກັນໂດຍຕົນເອງຂອງປະເທທີ່ມີອະທິປະໄຕ ແລະບັນດາປະເທດທີ່ລົງນາມໃນ 《ສົນທິສັນຍາວ່າດ້ວຍທະເລຂອງອົງການສະຫະປະຊາຊາດ》.
ທ່ານກ່າວວ່າ, ໃນໄລຍະມໍ່ໆມານີ້ ປະເທດເວເນຊູແອລາ ແລະໂມລີຕາເນຍກໍ່ຕ່າງໄດ້ສະແດງທ່າທີຢ່າງຈະແຈ້ງໃນການສະໜັບສະໜຸນຫຼັກການແລະຫຼັກໝັ້ນຂອງຈີນກ່ຽວກັບບັນຫາທະເລຈີນໃຕ້.
ທ່ານລູ້ຄ່າງກ່າວວ່າ, 《ຖະແຫຼງການໂດຮາ》ແລະການສະແດງທ່າທີຂອງປະເທດດັ່ງກ່າວສອດຄ່ອງກັບພຶດຕິກຳທົ່ວໄປຂອງບັນດາປະເທດໃນການແກ້ໄຂຄວາມຂັດແຍ່ງກັນດ້ວຍການເຈລະຈາກັນ, ໄດ້ສະແດງໃຫ້ເຫັນເຖິງຄວາມໝາຍແທ້ຈິງຂອງກົດໝາຍສາກົນ, ສ່ອງແສງເຖິງຄວາມເຫັນນອກຕົວທີ່ເປັນທຳຂອງປະຊາຄົມໂລກທີ່ມີຕໍ່ບັນຫາດັ່ງກ່າວ. ຈີນຂໍສະແດງຍ້ອງຍໍຊົມເຊີຍຕໍ່ປະເທດແລະອົງການຈັດຕັ້ງພາກພື້ນຕ່າງໆສົ່ງສຽງແຫ່ງຍຸດຕິທຳອອກມາ.