ວັນທີ 16 ພຶດສະພານີ້, ທ່ານຫວາງຢີ້, ລັດຖະມົນຕີວ່າການກະຊວງການຕ່າງປະເທດຈີນໄດ້ສົນທະນາທາງໂທລະສັບກັບທ່ານຈອນ ເຄຣີ, ລັດຖະມົນຕີວ່າການກະຊວງການຕ່າງປະເທດອາເມລິກາຕາມນັດໝາຍ.
ທ່ານຫວາງຢີ້ກ່າວວ່າ, ຈີນ-ອາເມລິກາຈະຈັດການສົນທະນາຍຸດທະສາດແລະເສດຖະກິດ ຮອບໃໝ່ລວມທັງປຶກສາຫາລືການແລກປ່ຽນວັດທະນະທຳລະດັບສູງ, ແລະແລກປ່ຽນການປະສານງານລະຫວ່າງສອງປະເທດຢ່າງໃກ້ຊິດກ່ຽວກັບການກະກຽມກອງປະຊຸມສຸດຍອດກຸ່ມ G20 ທີ່ຈະຈັດຂຶ້ນຢູ່ເມືອງຫາງໂຈ່ວ. ຈາກນັ້ນສອງຝ່າຍກໍຫວັງຈະສືບຕໍ່ສຸມໃສ່ການຮ່ວມມື, ແກ້ໄຂຄວາມຂັດແຍ້ງກັນຢ່າງເໝາະສົມ, ເຮັດໃຫ້ການພົວພັນລະຫວ່າງຈີນກັບອາເມລິກາຂະຫຍາຍຕົວຢ່າງແຂງແຮງ.
ທ່ານຫວາງຢີ້ກ່າວວ່າ, ຫວັງວ່າອາເມລິກາຈະຍຶດໝັ້ນນະໂຍບາຍຈີນດຽວ, ປະຕິບັດຕາມຖະແຫຼງການຮ່ວມຈີນອາເມລິກາສາມສະບັບ, ແລະແກ້ໄຂບັນຫາໄຕ້ຫວັນຢ່າງເໝາະສົມ.
ສ່ວນທ່ານເຄຣີກໍກ່າວວ່າ, ອາເມລິກາເອົາໃຈໃສ່ສູງຕໍ່ການຂະຫຍາຍສາຍພົວພັນກັບຈີນ. ຫຼັກໝັ້ນຂອງອາເມລິກາກ່ຽວກັບບັນຫາໄຕ້ຫວັນບໍ່ມີການປ່ຽນແປງ, ແລະກໍຈະບໍ່ປ່ຽນແປງ, ອາເມລິກາບໍ່ສະໜັບສະໜູນການ "ແຍກໄຕ້ຫວັນອອກຈາກປະເທດຈີນ"
ສອງຝ່າຍເຫັນດີສືບຕໍ່ເພີ່ມທະວີການຕິດຕໍ່ພົວພັນ, ແລະການແກ້ໄຂບັນຫາທາງທະເລຢ່າງເໝາະສົມ.