ທ່ານພຼານັບຄູມາ ມູເຮິຈີ, ປະທານາທິບໍດີອິນເດຍກ່າວໃນໂອກາດເດີນທາງຢ້ຽມຢາມຈີນໃນວັນທີ 24 ພຶດສະພານີ້ວ່າ, ໃນເກືອບ 10 ປີມານີ້, ການຄ້າລະຫວ່າງຈີນແລະອິນເດຍໄດ້ເພີ່ມຂຶ້ນຢ່າງຫຼວງຫຼາຍ ຄືແຕ່ປີ 2000 ເປັນຕົ້ນມາເພີ່ມຂຶ້ນ 20 ກວ່າເທົ່າ.
ໃນມື້ທຳອິດຂອງການຢ້ຽມຢາມຈີນ, ທ່ານມູເຮິຈີ ປະທານາທິບໍດີອິນເດຍໄດ້ພົບປະກັບຊາວອິນເດຍຢູ່ນະຄອນກວາງໂຈ່ວ ແລະໄດ້ກ່າວວ່າ, ແຕ່ປີ 1999 ເປັນຕົ້ນມາ, ການພົວພັນລະຫວ່າງສອງຝ່າຍໄດ້ຂະຫຍາຍຕົວດີທີ່ສຸດ ເຊິ່ງເຫັນໄດ້ຈາກຍອດມູນຄ່າການຄ້າລະຫວ່າງສອງປະເທດຈາກ 2 ຕື້ 900 ລ້ານໂດລາສະຫະລັດໃນປີ 2000 ເພີ່ມຂຶ້ນເຖິງ 71 ຕື້ໂດລາໃນປັດຈຸບັນນີ້. ປະເທດອິນເດຍມີກຳລັງບົ່ມຊ້ອນອັນໃຫຍ່ຫຼວງໃນການຮ່ວມມືເພື່ອການເຕີບໂຕທາງການຄ້າ, ການລົງທຶນ, ແລະເສດຖະກິດລະຫວ່າງສອງຝ່າຍ. ທ່ານມູເຮິຈີເນັ້ນວ່າ, ຖ້າວ່າປະຊາຊົນອິນເດຍແລະຈີນເປັນຈິດໜຶ່ງໃຈດຽວກັນແລະມີຄວາມພະຍາຍາມຮ່ວມກັນ, ຈະເຮັດໃຫ້ການພົວພັນລະຫວ່າງສອງຊາດຂະຫຍາຍຕົວກ້າວໜ້າຢ່າງໝັ້ນທ່ຽງ.