ວັນທີ 24 ພຶດສະພານີ້, ທ່ານ ຣາຊິດ ອາລີມົຟ ເລຂາທິການໃຫຍ່ອົງການຮ່ວມມືຊຽງໄຮ ໄດ້ອອກຖະແຫຼງການກ່ຽວກັບບັນຫາທະເລຈີນໃຕ້ຫຼັງ ສຳເລັດກອງປະຊຸມລັດຖະມົນຕີການຕ່າງປະເທດຂອງປະເທດສະມາຊິກອົງການດັ່ງກ່າວ.
ຖະແຫຼງການດັ່ງກ່າວລະບຸວ່າ, ປະເທດສະມາຊິກອົງການຮ່ວມມືຊຽງໄຮເຫັນວ່າ, ການປົກປັກຮັກສາແລະຟື້ນຟູສັນຕິພາບແລະສະຖຽນລະພາບຂອງພາກພື້ນອາຊີປາຊີຟິກ ລວມທັງເຂດທະເລຈີນໃຕ້ນັ້ນ ມີຄວາມໝາຍສຳຄັນ ໂດຍໄດ້ເຂົ້າໃຈແລະສະໜັບສະໜູນລັດຖະບານຈີນທີ່ພະຍາຍາມປົກປັກຮັກສາສັນຕິພາບແລະສະຖຽນລະພາບຂອງເຂດທະເລຈີນໃຕ້ ທັງສະໜັບສະໜູນປະເທດໃນພາກພື້ນນີ້ໃນການຊຸກຍູ້ສະພາບແວດລ້ອມທີ່ມີສັນຕິພາບ, ມິດຕະພາບແລະປອງດອງກັນ.
ຖະແຫຼງການຍັງລະບຸອີກວ່າ, ປະເທດສະມາຊິກອົງການຮ່ວມມືຊຽງໄຮສະໜັບ ສະໜູນປະເທດທີ່ກ່ຽວຂ້ອງໃນການແກ້ໄຂບັນຫາຂັດແຍ້ງກັນດ້ານດິນແດນແລະທະເລດ້ວຍການປຶກສາຫາລືແລະເຈລະຈາກັນຢ່າງມີໄມຕີຈິດມິດຕະພາບໂດຍອີງຕາມການກຳນົດຂອງສັນຍາສອງຝ່າຍແລະ "ຖະແຫຼງການວ່າດ້ວຍການປະພຶດຂອງຝ່າຍຕ່າງໆຕໍ່ບັນຫາທະເລຈີນໃຕ້" ທັງເຫັນວ່າ, ຄວນເຄົາລົບ ສິດຂອງປະເທດທີ່ມີອະທິປະໄຕໃນການເລືອກເອົາຮູບການແກ້ໄຂຂໍ້ວິວາດກັນໂດຍຕົນເອງຢ່າງເຕັມສ່ວນ. ແນວໃດກໍດີ ດ້ວຍຄວາມເປັນຈິງຄືດັ່ງກ່າວ, ພວກເຮົາເດັດດ່ຽວຄັດຄ້ານປະເທດນອກພາກພື້ນເຂົ້າແຊກແຊງບັນຫາທະເລຈີນໃຕ້ ແລະຄັດຄ້ານການເອົາບັນຫາທະເລຈີນໃຕ້ກາຍເປັນບັນຫາສາກົນ.
 |
