ຕາມຂ່າວCRI: ວັນທີ 26 ພຶດສະພານີ້, ທ່ານເສີງຟູລາຍ, ຊ່ຽວຊານດ້ານເສດຖະກິດລະດັບສູງຂອງກົມວາງແຜນສິ່ງແວດລ້ອມອົງການສະຫະປະຊາຊາດ UNEP ກ່າວວ່າ, ຍຸດທະສາດສິວິໄລຊີວະພາບຈີນມີການປະດິດສ້າງໃໝ່, ນັບແຕ່ໄດ້ປະຕິບັດເປັນຕົ້ນມາ, ການປັບປຸງສິ່ງແວດລ້ອມຂອງຈີນໄດ້ຮັບຜົນສຳເລັດຢ່າງເດັ່ນຊັດ, ທັດສະນະແລະພຶດຕິກຳຂອງການສ້າງສາດ້ານສິລິໄລຊີວະພາບຂອງຈີນສາມາດກາຍເປັນບົດຮຽນໃຫ້ແກ່ການພັດທະນາແບບຍືນຍົງຂອງທົ່ວໂລກໄດ້.
ກະຊວງການອະນຸລັກສິ່ງແວດລ້ອມຈີນແລະກົມວາງແຜນສິ່ງແວດລ້ອມຂອງສະຫະປະຊາຊາດໄດ້ເຜີຍແຜ່ບົດລາຍງານທີ່ມີຊື່ວ່າ "ນ້ຳໃສພູຂຽວ:ກໍ່ແມ່ນຊັບສິນທີ່ລ້ຳເລີດ ຍຸດທະສາດແລະການປະພຶດດ້ານສິວິໄລຊີວະພາບຂອງຈີນ" ໃນກອງປະຊຸມໃຫຍ່ສິ່ງແວດລ້ອມອົງການສະຫະປະຊາຊາດຄັ້ງທີ 2 ທີ່ໄຂຂຶ້ນໃນວັນທີ 28 ນີ້. ທ່ານເສີງຟູລາຍ, ຜູ້ຊີ້ນຳຂອງບົດລາຍງານສະບັບດັ່ງກ່າວກ່າວວ່າ, ທັດສະນະສິວິໄລຊີວະພາບຂອງຈີນບໍ່ພຽງແຕ່ເອົາສັງຄົມ, ເສດຖະກິດແລະສິ່ງແວດລ້ອມປະສານສົມທົບກັນທໍ່ນັ້ນ, ຍັງລວມທັງເຖິງການເມືອງແລະວັດທະນະທຳ, ເຊິ່ງຖືການພັດທະນາແບບຍືນຍົງ, ມະນຸດກັບທຳມະຊາດມີຄວາມປອງດອງກັນເປັນເປົ້າໝາຍ, ເອົາສິ່ງແວດລ້ອມແລະຮູບແບບຕຳລົງຊີວິດຂອງມະນຸດເຮົາປະສານສົມທົບກັນຢ່າງແໜ້ນແຟ້ນ.
ທ່ານເສີງຟູລາຍກ່າວວ່າ, ນັບແຕ່ຈີນເລີ່ມປະຕິບັດຍຸດທະສາດສິວິໄລຊີວະພາບເປັນຕົ້ນມາ, ໄດ້ຮັບຜົນສຳເລັດທີ່ປະຈັກຕາ ຄື: ອັດຕາປົກຫຸ້ມຂອງປ່າໄມ້ຢູ່ຈີນຈາກ 16% ຂອງເນື້ອທີ່ຜືນແຜ່ນດິນຈີນເມື່ອປີ 2001 ເພີ່ມຂຶ້ນຮອດ 21% ເມື່ອປີ 2013: ປະລິມານການຜະລິດລົດຍົນທີ່ໃຊ້ພະລັງງານໃໝ່ໄດ້ເພີ່ມຂຶ້ນ 45 ເທົ່າພາຍໃນ 4 ປີແຕ່ປີ 2011 ຫາປີ 2015.
ກອງປະຊຸມໃຫຍ່ສິ່ງແວດລ້ອມຂອງອົງການສະຫະປະຊາຊາດຄັ້ງທີ 2 ໄດ້ຈັດຂຶ້ນຢູ່ນະຄອນຫຼວງເນໂຣບີຂອງເຄັນຢາແຕ່ວັນທີ 23 ຫາວັນທີ 27 ພຶດສະພານີ້, ມີຜູ້ຕາງໜ້າປະມານ 2000 ຄົນທີ່ມາຈາກ 170 ກວ່າປະເທດແລະເຂດແຄ້ວນ, ອົງການຈັດຕັ້ງສາກົນແລະອົງການຈັດຕັ້ງທີ່ບໍ່ຂຶ້ນກັບລັດຖະບານ 20 ກວ່າແຫ່ງ, ໃນນັ້ນລວມທັງເຈົ້າໜ້າທີ່ລະດັບລັດຖະມົນຕີ 120 ກວ່າຄົນ.