ແຫຼ່ງຂ່າວຈາກເວັບໄຊຂ່າວກວາງຊີໃຫ້ຮູ້ວ່າ: ສູນຂໍ້ມູນຂ່າວສານການຈໍລະຈອນສິນຄ້າລະຫວ່າງທ່າເຮືອຈີນ-ອາຊຽນໄດ້ເລີ່ມເປີດນຳໃຊ້ຢູ່ເຂດກວາງຊີ ສປ ຈີນຢ່າງເປັນທາງການແລ້ວຫວ່າງມໍ່ໆມານີ້.
ການເປີດນຳໃຊ້ສູນຂໍ້ມູນຂ່າວສານດັ່ງກ່າວ ຈະເຮັດໃຫ້ຂໍ້ມູນຂ່າວສານການຂົນສົ່ງທາງທະເລຂະຫຍາຍກວມເອົາທັງການຂົນສົ່ງທາງບົກ, ທາງລົດໄຟ ແລະ ທາງອາກາດ, ບັນລຸການຊົມໃຊ້ຂໍ້ມູນການຈໍລະຈອນສິນຄ້າຮອບດ້ານແລະທົ່ວໂລກຮ່ວມກັນ, ເປັນຊ່ອງທາງແລະຄວາມຮັບປະກັນສຳລັບການເຊື່ອມຈອດຂໍ້ມູນການຈໍລະຈອນສິນຄ້າຈີນ-ອາຊຽນຢ່າງມີປະສິດທິພາບ, ພ້ອມທັງຈະກາຍເປັນຕາໜ່າງແລກປ່ຽນຂໍ້ມູນເອເລັກໂຕຣນິກດ້ານການຈໍລະຈອນສິນຄ້າທີ່ໃຫຍ່ທີ່ສຸດລະຫວ່າງຈີນ-ອາຊຽນ ເພື່ອບັນລຸການຈໍລະຈອນສິນຄ້າແບບສະມາດ ເຊິ່ງຈະມີປະສິດທິຜົນດ້ານເສດຖະກິດທີ່ສຳຄັນ.
ໃນພິທີເປີດນຳໃຊ້ສູນດັ່ງກ່າວ, ຫົວໜ້າຄະນະອຳນວຍການກຸ່ມທ່າເຮືອກວນຕານປະເທດມາເລເຊຍ ກ່າວວ່າ: ການເປີດນຳໃຊ້ສູນຂໍ້ມູນຂ່າວສານການຈໍລະຈອນສິນຄ້າລະຫວ່າງທ່າເຮືອຈີນ-ອາຊຽນຫຼັງສຳເລັດການກໍ່ສ້າງ ຈະເຮັດໃຫ້ການບໍລິການຂໍ້ມູນຂ່າວສານວ່ອງໄວກວ່າເກົ່າໃຫ້ແກ່ການຄ້າລະຫວ່າງທ່າເຮືອຈີນ-ປະເທດອາຊຽນ, ຫວັງວ່າໂຄງການດັ່ງກ່າວຈະສ້າງຂົວຂໍ້ມູນການຄ້າອັນໜັກແໜ້ນລະຫວ່າງອາຊຽນ-ຈີນ.