ຕາມຂ່າວ CRI: ຫວ່າງມໍ່ໆນີ້, ສູນອົບຮົມສິລະປະຈີນ-ອາຊຽນໄດ້ເປີດຊຸດຝຶກອົບຮົມສິລະປະການຟ້ອນຢູ່ສະຖາບັນສິລະປະກວາງຊີ ໂດຍນັກຟ້ອນແລະນັກສຶກສາຂະແໜງການຟ້ອນຈາກລາວ, ກຳປູເຈຍ, ມຽນມາແລະໄທກໍຄືອາຈານແລະນັກສຶກສາຈີນເຂົ້າຮ່ວມຊຸດຝຶກອົບຮົມດັ່ງກ່າວ.
ສູນອົບຮົມສິລະປະຈີນ-ອາຊຽນຂອງສະຖາບັນສິລະປະກວາງຊີແມ່ນໜຶ່ງໃນ 4 "ສູນອົບຮົມຊັບພະຍາກອນມະນຸດດ້ານສິລະປະຈີນ-ອາຊຽນ" ທີ່ກະຊວງສຶກສາທິການແລະກະຊວງການຕ່າງປະເທດຈີນເປີດຢູ່ເຂດປົກຄອງຕົນເອງເຜົ່າຈວ້າງກວາງຊີເປັນໄລຍະທຳອິດເຊິ່ງມາຮອດປັດຈຸບັນ, ສູນດັ່ງກ່າວໄດ້ຍົກລະດັບໃຫ້ແກ່ສິລະປິນການຟ້ອນ, ດົນຕີແລະອື່ນໆ 1 ຮ້ອຍກວ່າທ່ານໃຫ້ແກ່ຫຼາຍໜ່ວຍງານສິລະປະລະດັບຊາດຂອງປະເທດອາຊີຕາເວັນອອກສຽງໃຕ້ແລ້ວ.
ຫົວໜ້າຫ້ອງການຄຸ້ມຄອງນັກສຶກສາຂອງໂຮງຮຽນສິລະປະແຫ່ງຊາດລາວໄດ້ຕີລາຄາສູງວ່າ: ສະຖາບັນສິລະປະກວາງຊີເປັນສະຖາບັນທີ່ດີ ສຳລັບການຮ່ຳຮຽນກໍຄືແລກປ່ຽນສິລະປະວັດທະນະທຳທີ່ເປັນມູນເຊື້ອລະຫວ່າງ 4 ປະເທດສະມາຊິກອາຊຽນ, ເຊິ່ງລາວແລະຈີນກໍສາມາດຮຽນຮູ້ແລະແລກປ່ຽນສິລະປະວັດທະນະທຳຮ່ວມກັນ, ແລະໄດ້ເພີ່ມທະວີຄວາມສາມັກຄີແລະມິດຕະພາບລະຫວ່າງສອງປະເທດແລະກໍເຮັດໃຫ້ວັດທະນະທຳທີ່ເປັນມູນເຊື້ອອັນລ້ຳຄ່າຂອງແຕ່ລະປະເທດສືບຕໍ່ໄດ້ຮັບການອະນຸລັກຮັກສາແລະປະສົມປະສານກັນ. ຈາກນີ້ພວກເຮົາຈຶ່ງເວົ້າໄດ້ວ່າ, ສິລະປະວັດທະນະທຳໃນຖານະເປັນຂົວຕໍ່ແຫ່ງການສ້າງຄວາມສາມັກຄີແລະມິດຕະພາບລະຫວ່າງປະເທດອາຊຽນ-ຈີນນັ້ນ, ຈະເຊື່ອມຕໍ່ປະເທດຕ່າງໆໃຫ້ຢູ່ຮ່ວມກັນຢ່າງໃກ້ຊິດຕະຫຼອດໄປແລະນີ້ຄືບົດບາດຂອງສິລະປະວັດທະນະທຳ."
ປີ 2016 ເປັນປີແຫ່ງການສ້າງສາຍພົວພັນຄູ່ເຈລະຈາລະຫວ່າງຈີນ-ອາຊຽນຄົບຮອບ 25 ປີ, ຂະນະດຽວກັນກໍເປັນປີແລກປ່ຽນການສຶກສາລະຫວ່າງຈີນ-ອາຊຽນແລະຈາກຄວາມສຳຄັນດັ່ງກ່າວ, ສະຖາບັນສິລະປະກວາງຊີພ້ອມຈະຈັດກິດຈະກຳຮ່ວມກັບມະຫາວິທະຍາໄລຂອງອາຊຽນຢ່າງຕັ້ງໜ້າ ເພື່ອຊຸກຍູ້ການແລກປ່ຽນວິຊາການລະຫວ່າງນັກຟ້ອນໜຸ່ມຈີນ-ອາຊຽນ. ຂ່າວແຈ້ງວ່າ, ນັກຟ້ອນກໍຄືນັກສຶກສາຂະແໜງການຟ້ອນຈາກມະຫາວິທະຍາໄລສິລະປະແຫ່ງຊາດກຳປູເຈຍ, ສະຖາບັນພັດທະນາສິລະປະກະຊວງວັດທະນະທຳໄທ, ມະຫາວິທະຍາໄລສິລະປະວັດທະນະທຳແຫ່ງຊາດມຽມາ 30 ທ່ານໄດ້ເຊີນໃຫ້ເຂົ້າຮ່ວມຊຸດຝຶກອົບຮົມດັ່ງກ່າວ. ຫຼັງຈາກສຳເລັດຊຸດຝຶກອົບຮົມດັ່ງກ່າວຍັງຈະຈັດຕັ້ງມີການສະແດງຂອງນັກສຶກສາທີ່ສຳເລັດການຝຶກອົບຮົມ.