ວັນທີ 3 ມິຖຸນານີ້, ກອງປະຊຸມສຳມະນາຈີນ-ອາຊຽນສ້າງສາຍພົວພັນຄູ່ເຈລະຈາຄົບຮອບ 25 ປີທີ່ຄະນະຜູ້ຕ່າງໜ້າຖາວອນຈີນປະຈຳອາຊຽນເປັນເຈົ້າພາບໄດ້ຈັດຂຶ້ນຢູ່ເມືອງຊາມະຣັງແຂວງຈາວາກາງປະເທດອິນໂດເນເຊຍ.
ຜູ້ຊ່ຽວຊານປະມານ 30 ທ່ານທີ່ມາຈາກອິນໂດເນເຊຍ, ໄທ, ມາເລເຊຍ, ສິງກະໂປ, ກຳປູເຈຍ, ຟີລິບປີນແລະຈີນໄດ້ເຂົ້າຮ່ວມກອງປະຊຸມສຳມະນາເທື່ອນີ້. ເຊິ່ງພວກເພິ່ນໄດ້ຫວນຄືນ 25 ປີທີ່ຈີນແລະອາຊຽນສ້າງການພົວພັນຄູ່ເຈລະຈາ, ແລະໄດ້ປຶກສາຫາລືສະຖານະການຄວາມໝັ້ນຄົງຂອງອາຊີຕາເວັນອອກ, ການສ້າງກົນໄກຄວາມໝັ້ນຄົງຂອງອາຊີຕາເວັນອອກແລະບັນຫາທະເລຈີນໃຕ້.
ຜູ້ເຂົ້າຮ່ວມກອງປະຊຸມພາກັນສະແດງວ່າ, ພາຍຫຼັງປະຊາຄົມອາຊຽນສ້າງສຳເລັດໃນທ້າຍປີ 2015 ແລ້ວ, ລະດັບການຄ້າເສລີແລະເຊື່ອມຈອດກັນພາຍໃນອາຊຽນໄດ້ຍົກສູງຂຶ້ນຢ່າງບໍ່ຢຸດຢັ້ງ. ຄຽງຄູ່ກັບຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນໄດ້ພັດທະນາຢູ່ເຂດອາຊີຕາເວັນອອກສຽງໃຕ້, ການຍົກລະດັບຂອງເຂດການຄ້າເສລີຈີນ-ອາຊຽນຈະອຳນວຍໂອກາດທີ່ດີໃຫ້ແກ່ການລົງເລິກການພົວພັນລະຫວ່າງສອງຝ່າຍ.
ຜູ້ເຂົ້າຮ່ວມປະຊຸມເຫັນວ່າ, ສະຖານະການຄວາມໝັ້ນຄົງຂອງພາກພື້ນຕ້ອງການປະເທດຕ່າງໆຢູ່ພາກພື້ນແຫ່ງນີ້ຮ່ວມກັນປົກປັກຮັກສາ, ຂະນະທີ່ການຮັກສາຄວາມໝັ້ນຄົງຂອງອາຊີຕາເວັນອອກແມ່ນຄວາມປາດຖະໜາຮ່ວມກັນຂອງປະຊາຊົນບັນດາປະເທດຢູ່ພາກພື້ນແຫ່ງນີ້.
 |
