ຕາມຂ່າວສານຊິນຮວາ: ວັນທີ 4 ມິຖຸນານີ້, ທ່ານນາງ ຮວ້າຊຸນຢິງ ໂຄສົກກະຊວງການຕ່າງປະເທດຈີນໄດ້ຕອບຄຳຖາມຂອງນັກຂ່າວກ່ຽວກັບຄຳເຫັນຂອງບຸກຄົນທີ່ກ່ຽວຂ້ອງທີ່ກ່າວໃນກອງປະຊຸມສົນທະນາແຊງລີລາ.
ມີນັກຂ່າວຖາມວ່າ: ວັນທີ 3 ມິຖຸນານີ້, ທ່ານ ປຣະຢຸດ ຈັນໂອຊານາຍົກລັດຖະ ມົນຕີໄທໄດ້ກ່າວປາໄສໃນພິທີເປີດກອງປະຊຸມດັ່ງກ່າວວ່າ, ບັນດາປະເທດຢູ່ພາກພື້ນຄວນປະຄວາມຂັດແຍ້ງກັນຕໍ່ບັນຫາຊາຍແດນທາງທະເລແລະສະແຫວງຫາການເພີ່ມທະວີການຮ່ວມມືໂດຍຜ່ານຮູບແບບຕ່າງຝ່າຍຕ່າງມີຜົນປະໂຫຍດ. ຂະນະທີ່ທ່ານ ຣິອາມີຈາດ ຣິອາຄຸດຸ ລັດຖະມົນຕີປ້ອງກັນປະເທດອິນໂດເນເຊຍກ່າວໃນກອງປະຊຸມວ່າ, ຄວນພິຈາລະນາ "ກົດບັດສະຫະປະຊາຊາດ" "ສົນທິສັນຍາສະຫະປະຊາຊາດວ່າດ້ວຍກົດໝາຍທະເລ" "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້" ແລະທາງປະຫວັດສາດຢ່າງຮອບດ້ານເພື່ອແກ້ໄຂຄວາມຂັດແຍ້ງກັນຢູ່ທະເລຈີນໃຕ້ຢ່າງເທື່ອລະກ້າວ. ຂໍຖາມວ່າຈີນມີຄຳເຫັນ ແນວໃດຕໍ່ເລື່ອງດັ່ງກ່າວ?
ທ່ານນາງ ຮວ້າຊຸນຢິງ ກ່າວວ່າ, ຈີນໄດ້ເຫັນການສະແດງທ່າທີທີ່ກ່ຽວຂ້ອງແລ້ວ. ຈີນເຫັນດີແລະລິເລີ່ມໃຫ້ແກ້ໄຂບັນຫາທະເລຈີນໃຕ້ຢ່າງເໝາະສົມດ້ວຍ "ແນວຄວາມຄິດສອງຊ່ອງທາງ" ທີ່ສະເໜີໂດຍປະເທດອາຊຽນຄື ໃຫ້ປະເທດທີ່ກ່ຽວຂ້ອງແກ້ໄຂຄວາມຂັດແຍ້ງກັນຢ່າງເໝາະສົມໂດຍຜ່ານການປຶກສາຫາລືແລະການເຈລະຈາໂດຍກົງ, ຈີນແລະອາຊຽນຮ່ວມກັນປົກປັກຮັກສາສັນຕິພາບແລະສະຖຽນລະພາບຂອງທະເລຈີນໃຕ້. ນາງກ່າວຕື່ມວ່າ, ສຳລັບປະເທດໃນພາກພື້ນແລ້ວ, ສິ່ງທ້າທາຍຈາກບັນຫາຄວາມໝັ້ນຄົງທາງທະເລແບບໃໝ່ໃນປັດຈຸບັນມີຄວາມຂ້ຽວຂາດຫຼາຍກວ່າ, ເຊິ່ງຝ່າຍຕ່າງໆຄວນເພີ່ມທະວີການຮ່ວມມືທາງທະເລທີ່ແທ້ຈິງ ເພື່ອຮ່ວມກັນຮັບມືກັບໄພຂົ່ມຂູ່ຕໍ່ຄວາມໝັ້ນຄົງທາງທະເລແບບໃໝ່ໃຫ້ດີແລະປົກປັກຮັກສາສັນຕິພາບແລະສະຖຽນລະພາບທາງທະເລຂອງພາກພື້ນ.