ກອງປະຊຸມສົນທະນາທາງຍຸດທະສາດແລະເສດຖະກິດລະຫວ່າງຈີນ-ອາເມລິກາຄັ້ງທີ 8 ທີ່ຈັດຂຶ້ນຢູ່ນະຄອນຫຼວງປັກກິ່ງໄດ້ສຳເລັດແລ້ວໃນຕອນບ່າຍວັນທີ 7 ມິຖຸນານີ້ ໂດຍສອງຝ່າຍໄດ້ບັນລຸຂໍ້ຕົກລົງກ່ຽວກັບການຮ່ວມມືໃນຫຼາຍຂົງເຂດທັງຂອບສອງຝ່າຍແລະຫຼາຍຝ່າຍ ເຊັ່ນ ຊຸກຍູ້ການເຈລະຈາສັນຍາການລົງທຶນລະຫວ່າງສອງຝ່າຍ ແລະ ເພີ່ມທະວີການຮ່ວມມືດ້ານການທະນາຄານ. ນອກນີ້, ສອງຝ່າຍເຫັນພ້ອມກັນຈະຄວບຄຸມຄວາມເຫັນຂັດແຍ້ງກັນລະຫວ່າງສອງປະເທດດ້ວຍວິທີສ້າງສັນ.
ໃນກອງປະຊຸມສົນທະນາເທື່ອນີ້, ການຮ່ວມມືດ້ານການທະນາຄານລະຫວ່າງຈີນແລະອາເມລິກາມີຄວາມຄືບໜ້າທີ່ສຳຄັນ ໂດຍອົງການຕິດຕາມຄຸ້ມຄອງການທະນາຄານຂອງສອງປະເທດກໍຍິນດີຊຸກຍູ້ການນຳໃຊ້ຂໍ້ມູນຂ່າວສານຮ່ວມກັນແລະຮ່ວມມືກັນຈັດຕັ້ງປະຕິບັດກົດໝາຍຂ້າມຊາດ ເຊັ່ນ ເພີ່ມທະວີການຮ່ວມມືຕິດຕາມການຕ້ານການຟອກເງິນ, ການລະດົມທຶນເພື່ອຕ້ານລັດທິກໍ່ການຮ້າຍ, ລວມທັງການຜະລິດແລະນຳໃຊ້ເງິນປອມ ແລະອື່ນໆ. ນອກນີ້, ສອງຝ່າຍຍັງເຫັນດີຮ່ວມມືກັນໃຫ້ແໜ້ນແຟ້ນຕື່ມ ເພື່ອຮ່ວມກັບຝ່າຍຕ່າງໆຊຸກຍູ້ກອງປະຊຸມສຸດຍອດກຸ່ມ 20 ປະເທດທີ່ຈະຈັດຂຶ້ນຢູ່ເມືອງຫັງໂຈ່ວຂອງຈີນໃນເດືອນກັນຍາປີນີ້ໃຫ້ໄດ້ຮັບຜົນຕາມຄາດໝາຍ ແລະຮັບປະກັນໃຫ້ການພົບປະລະຫວ່າງປະມຸກລັດສອງປະເທດໄດ້ຮັບຜົນສຳເລັດເປັນຢ່າງດີ. ຂະນະດຽວກັນ, ສອງຝ່າຍຍັງເຫັນດີເພີ່ມທະວີການແລກປ່ຽນແລະຮ່ວມມືໃນຂົງເຂດຕ່າງໆ ເຊັ່ນ ການຕ້ານລັດທິກໍ່ການຮ້າຍ, ອິນເຕີເນັດ, ຕຸລາການແລະການປະຕິບັດກົດໝາຍ, ການນຳຈັບຜູ້ສໍ້ລາດບັງຫຼວງແລະກູ້ຂອງກາງຄືນ, ພະລັງງານ, ການອະນຸລັກສິ່ງແວດລ້ອມ, ດ່ານພາສີ, ສາທາລະນະສຸກ, ການບິນ, ການອະນຸລັກທະເລ ແລະອື່ນໆ ເພື່ອສ້າງຜົນປະໂຫຍດທີ່ແທ້ຈິງໃຫ້ແກ່ປະຊາຊົນສອງຊາດຫຼາຍກວ່າເກົ່າ.