ຕອນຮຸ່ງເຊົ້າວັນທີ 12 ມິຖຸນານີ້ຕາມເວລາທ້ອງຖິ່ນ, ຢູ່ຮ້ານລາຕີບັນເທີງແຫ່ງໜຶ່ງໃນເມືອງໂອລານໂດສະຫະລັດອາເມລິກາ ໄດ້ເກີດເຫດກວາດຍິງປືນໃສ່ນັກທ່ຽວລາຕີ ສົ່ງຜົນເຮັດໃຫ້ 50 ຄົນເສຍຊີວິດເປັນຢ່າງໜ້ອຍ ແລະອີກ 53 ຄົນບາດເຈັບ, ຂະນະທີ່ທ່ານ ບາຣັກ ໂອບາມາ ປະທານາທິບໍດີອາເມລິກາປະນາມວ່ານີ້ແມ່ນການກໍ່ການຮ້າຍ.
ເຫດການດັ່ງກ່າວເກີດຂຶ້ນໃນເວລາປະມານ 2 ໂມງຂອງວັນທີ 12 ມິຖຸນານີ້ຕາມເວລາທ້ອງຖິ່ນ ໂດຍຫຼັງເກີດເຫດ, ທ່ານ ຈອນ ມີນາ ຫົວໜ້າພະແນກຕຳຫຼວດເມືອງໂອລານໂດກ່າວວ່າ, ມືປືນຄົນໜຶ່ງເຄີຍຍິງຕໍ່ສູ້ກັບຕຳຫຼວດຜູ້ໜຶ່ງໃນເວລາສັ້ນໆ ແລະຮ່ອງຮອຍຢູ່ສະຖານທີ່ເກີດເຫດສະແດງໃຫ້ເຫັນວ່າ ການຫຼອນໂຈມຕີຂອງມືປືນ "ມີການຈັດຕັ້ງແລະກະກຽມມາເປັນຢ່າງດີ". ຂະນະທີ່ທ່ານ ບຸດດີ ດີເອີ ເຈົ້າເມືອງໂອລານໂດຢືນຢັນໃນມື້ດຽວກັນວ່າ, ເຫດການດັ່ງກ່າວສົ່ງຜົນເຮັດໃຫ້ 50 ຄົນເສຍຊີວິດແລະອີກ 53 ຄົນບາດເຈັບ.
ມື້ດຽວກັນ, ທຳນຽບຂາວໄດ້ຖະແຫຼງຂ່າວວ່າ, ເຖິງວ່າປັດຈຸບັນຢູ່ໃນໄລຍະສືບສວນເບື້ອງຕົ້ນກໍຕາມ, ແຕ່ກໍສາມາດເກັບກຳຂໍ້ມູນໄດ້ຢ່າງພຽງພໍແລ້ວທີ່ຈະສະຫຼຸບໄດ້ວ່າ ນີ້ແມ່ນການກະທຳກໍ່ການຮ້າຍແລະເປັນຄວາມອາຄາດບາດໝາງ.
ສື່ມວນຊົນອາເມລິກາລາຍງານວ່າ, ນີ້ແມ່ນເຫດການກວາດຍິງທີ່ເຮັດໃຫ້ຄົນເສຍຊີວິດຫຼາຍທີ່ສຸດໃນປະຫວັດສາດຂອງອາເມລິກາ.
 |
