ພາຍຫຼັງສຳເລັດການເດີນທາງຢ້ຽມຢາມສາທາລະນະລັດເຊັກທາງລັດຖະກິດເປັນຄັ້ງທຳອິດ ແລະຈາກວັນນັ້ນເຖິງວັນນີ້ບໍ່ເຖິງ 3 ເດືອນ, ທ່ານ ສີຈິ້ນຜິງ ປະທານປະເທດຈີນ ກໍໄດ້ເດີນທາງໄປຢ້ຽມຢາມເຂດເອີຣົບກາງແລະເອີຣົບຕາເວັນອອກອີກເທື່ອໜຶ່ງ ເພື່ອຢ້ຽມຢາມປະເທດແຊກບີແລະໂປໂລຍທາງລັດຖະກິດ. ກ່ຽວກັບເລື່ອງນີ້, ໜັງສືພິມປະຊາຊົນລາຍວັນຂອງຈີນສະບັບວັນທີ 17 ມິຖຸນານີ້ໄດ້ລົງພິມບົດຄວາມໃນຫົວຂໍ້ "ຕື່ມກຳລັງໃໝ່ເຂົ້າໃນການຊຸກຍູ້ການຮ່ວມມືລະຫວ່າງຈີນ-ເອີຣົບກາງເອີຣົບຕາເວັນອອກ".
ບົດຄວາມດັ່ງກ່າວມີບາງຕອນຂຽນວ່າ, ການຢ້ຽມຢາມທີ່ເປັນຂີດໝາຍແລະມີຄວາມໝາຍນັ້ນຈະເປີດສາກ ເພື່ອບູລະນະມິດຕະພາບທີ່ເປັນມູນເຊື້ອ, ລົງເລິກການຮ່ວມມືທີ່ແທດເໝາະກັບສະພາບຕົວຈິງ ແລະຮ່ວມກັນຊົມໃຊ້ໝາກຜົນແຫ່ງການພັດທະນາ, ຂະນະທີ່ສາຍພົວພັນຈີນ-ເອີຣົບກາງເອີຣົບຕາເວັນອອກພວມບັນທຶກໃນໜ້າປະຫວັດສາດໃໝ່ແຫ່ງການພັດທະນາ.
ບົດຄວາມລະບຸວ່າ, ເຖິງວ່າຈີນກັບປະເທດເອີຣົບກາງເອີຣົບຕາເວັນອອກມີຄວາມແຕກຕ່າງກັນທາງລະບອບການເມືອງ, ສັງຄົມ ແລະວັດທະນະທຳເປັນຕົ້ນກໍຕາມ, ແຕ່ສອງຝ່າຍກໍມີຄວາມປາຖະໜາຮ່ວມແລະມີຄວາມໝັ້ນໃຈຢ່າງເດັດດ່ຽວໃນການພັດທະນາສາຍພົວພັນມິດຕະພາບ ທັງໄດ້ພະຍາຍາມລົງເລິກການຮ່ວມມື ແລະປະສົບຜົນສຳເລັດເປັນຢ່າງດີ.
ບົດຄວາມຊີ້ໃຫ້ເຫັນວ່າ, ໃນໄລຍະໃໝ່ຈະສ້າງສະຖານະການໃໝ່ ໂດຍ 16 ປະເທດເອີຣົບກາງແລະເອີຣົບຕາເວັນອອກ ລ້ວນແຕ່ຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ". ແນວໃດກໍດີ ປັດຈຸບັນ, 16 ປະເທດເຫຼົ່ານີ້ ໄດ້ມີ 7 ປະເທດເຊັນບົດບັນທຶກຄວາມເຂົ້າໃຈກັບລັດຖະບານຈີນກ່ຽວກັບ "ໜຶ່ງແລວທາງໜຶ່ງເສັ້ນທາງ"