ຕາມຂ່າວCRI: ວັນທີ 18 ມິຖຸນານີ້, ທ່ານສີຈິ້ນຜີງ, ປະທານປະເທດຈີນໄດ້ພົບປະກັບທ່ານອາເລັກຊານເດີ ວູຊິກ, ນາຍົກລັດຖະມົນຕີແຊັກບີຢູ່ນະຄອນຫຼວງແບນກຼາດຂອງແຊັກບີ.
ທ່ານສີຈິ້ນຜີງກ່າວເນັ້ນວ່າ, ຈີນກັບແຊັກບີແມ່ນເພື່ອນມິດທີ່ໄວ້ເນື້ອເຊື່ອໃຈກັນແລະຄູຮ່ວມມືທີ່ສຳຄັນ. ໃນຊຸມປີມໍ່ໆມານີ້, ການໄປມາຫາສູ່ກັນຂັ້ນສູງລະຫວ່າງສອງປະເທດມີຄວາມແໜ້ນແຟ້ນ, ການຮ່ວມມືໃນແຕ່ລະຂົງເຂດໄດ້ຮັບຜົນສຳເລັດຢ່າງເດັ່ນຊັດ. ສອງຝ່າຍເຫັນເປັນເອກະພາບກັນວ່າຈະຍົກສູງການພົວພັນລະຫວ່າງສອງປະເທດຂຶ້ນເປັນການພົວພັນຄູ່ຮ່ວມມືຍຸດທະສາດຮອບດ້ານ, ຈະທຸ່ມເທກຳລັງໃໝ່ເຂົ້າໃນການຮ່ວມມືຕົວຈິງໃນແຕ່ລະຂົງເຂດລະຫວ່າງສອງຝ່າຍ, ຈະຊຸກຍູ້ໃຫ້ການພົວພັນສອງຝ່າຍກ້າວເຂົ້າສູ່ລະດັບໃໝ່.
ທ່ານອາເລັກຊານເດີ ວູຊິກກ່າວວ່າ, ຍິນດີຕ້ອນຮັບອີກເທື່ອໜຶ່ງໃຫ້ແກ່ທ່ານປະທານປະເທດສີຈິ້ນຜີງທີ່ໄດ້ເດີນທາງມາຢ້ຽມຢາມແຊັກບີທີ່ມີລັກສະນະປະຫວັດສາດ. ການເຮັດໃຫ້ມິດຕະພາບຢ່າງເປັນມູນເຊື້ອ, ຄວາມໄວ້ເນື້ອເຊື່ອໃຈທາງການເມືອງແລະການຮ່ວມມືທີ່ມີຜົນດີຕໍ່ກັນລະຫວ່າງແຊັກບີກັບຈີນລົງສູ່ລວງເລິກຢ່າງຮອບດ້ານ, ສອດຄ່ອງກັບຜົນປະໂຫຍດຂອງປະຊາຊົນສອງປະເທດ. ລັດຖະບານແຊັກບີເອົາໃຈໃສ່ໃນລະດັບສູງຕໍ່ການພັດທະນາການພົວພັນກັບຈີນ, ພະຍາຍາມເພື່ອເປີດກວ້າງການຮ່ວມມືໃນຂົງເຂດທີ່ກວ້າງຂວາງກວ່າເກົ່າກັບຈີນ. ແຊັກບີຍິນດີຕ້ອນຮັບວິສາຫະກິດຈີນເພີ່ມທະວີການລົງທຶນຕໍ່ແຊັກບີ, ຍິນດີພະຍາຍາມຮ່ວມກັນກັບຈີນ, ຊຸກຍູ້ໃຫ້ການຮ່ວມມືຂອງໂຄງການສຳຄັນລະຫວ່າງແຊັກບີກັບຈີນໄດ້ຮັບຜົນສຳເລັດໂດຍໄວ.
ວັນທີ 18 ມິຖຸນານີ້, ທ່ານສີຈິ້ນຜີງ, ປະທານປະເທດຈີນຍັງໄດ້ພົບປະກັບທ່ານມາຢາ ໂກໂຄວິກ, ປະທານສະພາແຫ່ງຊາດແຊັກບີຢູ່ນະຄອນຫຼວງແບນກຼາດຂອງແຊັກບີ.